مسٹر برلا نے روس کی اسٹیٹ ڈوما کے اسپیکر ویچیسلاو وولودین سے ملاقات کے دوران ہندوستان اور روس کے درمیان خصوصی اور مراعات یافتہ اسٹریٹجک شراکت داری اور دونوں ممالک کے درمیان سفارتی تعلقات کے قیام کے 80 سال مکمل ہونے کی اہمیت کا ذکر کیا۔ انہوں نے دونوں ممالک کی پارلیمانوں کے درمیان بین پارلیمانی کمیشن کا اگلا اجلاس منعقد کرنے پر غور کرنے کی تجویز پیش کی۔ دونوں فریقوں نے پارلیمانی وفود کے باقاعدہ تبادلے، نوجوان اور خواتین اراکین پارلیمنٹ کے درمیان مکالمے اور پارلیمانی دوستی گروپوں کے ذریعے رابطے بڑھانے پر بھی تبادلۂ خیال کیا۔
مسٹر برلا نے پارلیمانی کارروائی کو مختلف ہندوستانی زبانوں میں قابل رسائی بنانے کے لیے ’سنسد بھاشنی‘ کے استعمال کے بارے میں معلومات فراہم کیں اور کہا کہ ٹیکنالوجی کے ذریعے پارلیمانی کام کاج کو زیادہ آسان اور عوام پر مرکوز بنایا جا سکتا ہے۔ دونوں فریقوں نے دہشت گردی کے خلاف بین الاقوامی تعاون کی ضرورت پر بھی بات چیت کی۔
انہوں نے دہشت گردی کے معاملے پر ہندوستان کی حمایت کرنے اور اقوام متحدہ کی سلامتی کونسل میں اصلاحات اور ہندوستان کی مستقل رکنیت کی حمایت کرنے پر روس کی ستائش کی۔ اجلاس میں تجارت، سائنس و ٹیکنالوجی، زراعت، صنعت اور عوام کے درمیان رابطوں کو فروغ دینے کے امکانات پر بھی غور کیا گیا۔
لوک سبھا اسپیکر نے کیوبا کی نیشنل اسمبلی آف پیپلز پاور اور کونسل آف اسٹیٹ کی نائب صدر اینا ماریا ماری ماچاڈو سے ملاقات کے دوران پارلیمانی تبادلے، صلاحیت سازی اور صحت خدمات و ادویات کے شعبوں میں تعاون بڑھانے پر تبادلۂ خیال کیا۔ انہوں نے عالمی جنوب کی ترجیحات کو آگے بڑھانے میں برکس کے کردار کا ذکر کرتے ہوئے کہا کہ دونوں ممالک کے درمیان پارلیمانی روابط مضبوط ہونے سے ان کی دیرینہ دوستی اور یکجہتی کو مزید تقویت ملے گی۔
مسٹر برلا نے مصر کے رکن پارلیمنٹ اور وہاں کے پارلیمانی وفد کے سربراہ سامح شکری کے ساتھ بات چیت میں دونوں قدیم تہذیبوں کے تاریخی تعلقات اور وزیر اعظم نریندر مودی کے 2023 کے دورۂ مصر کے بعد دو طرفہ تعلقات میں آنے والی نئی تیزی کا ذکر کیا۔ دونوں فریقوں نے پارلیمانی دوستی گروپوں کے ذریعے تعاون بڑھانے اور ادویات، کیمیکلز اور صنعت کے شعبوں میں شراکت داری کے امکانات پر تبادلۂ خیال کیا۔ مسٹر برلا نے پہلگام دہشت گردانہ حملے کی مصر کی جانب سے سخت مذمت کیے جانے کی ستائش کرتے ہوئے دہشت گردی سے نمٹنے کے لیے عالمی یکجہتی کی ضرورت پر زور دیا۔
لوک سبھا اسپیکر نے بیلاروس کی مجلسِ نمائندگان کے نائب اسپیکر وادیم ایپاتوف کے ساتھ ملاقات میں پارلیمانی تبادلے، قانون سازی کے کاموں کے بہتر طریقۂ کار کے تبادلے اور صلاحیت سازی پر تبادلۂ خیال کیا۔ دونوں فریقوں نے تجارت اور اقتصادی ترقی کو فروغ دینے کے لیے بینکاری روابط مضبوط بنانے کے امکانات پر بھی غور کیا۔ مسٹر برلا نے کثیر فریقی فورموں، بالخصوص برکس کے ذریعے عالمی جنوب کی آواز اور مشترکہ ترجیحات کو آگے بڑھانے کے ہندوستان کے عزم کا اعادہ کیا۔
انہوں نے کہا کہ 2027 میں ہندوستان اور بیلاروس کے درمیان سفارتی تعلقات کے قیام کے 35 سال مکمل ہونے کے موقع پر پارلیمانی روابط، اقتصادی و مالیاتی تعلقات اور عالمی امور پر تال میل کو مزید مضبوطی ملنے کی امید ہے۔
