ٹی ٹی ایل میں اسکولوں اور کالجوں کے لیے الگ الگ مقابلے ہوں گے، جس سے نوجوان کرکٹرز کو دیگر تعلیمی اداروں کی ٹیموں کے خلاف مسابقتی ٹی-20 کرکٹ کھیلنے کا موقع ملے گا۔ لیگ کے آغاز کے موقع پر لیگ کمشنر چیتن شرما نے کہا، ’’ہندوستان میں باصلاحیت نوجوان کرکٹرز کی کبھی کمی نہیں رہی۔ چیلنج یہ ہے کہ ان میں سے بہت سے کھلاڑیوں کو مسابقتی میچ کھیلنے کے زیادہ مواقع نہیں ملتے۔ آپ گھنٹوں پریکٹس کرسکتے ہیں، لیکن ایک مناسب میچ کھیلنے، دباؤ سے نمٹنے اور تجربے سے سیکھنے کا کوئی متبادل نہیں ہے۔ اسی لیے اس طرح کے ٹورنامنٹ اہم ہیں۔ ہم چاہتے ہیں کہ زیادہ سے زیادہ بچوں کو اسکول میں رہتے ہوئے ہی یہ تجربہ حاصل ہو۔ میں اس لیگ کا حصہ بننے اور ان نوجوانوں کو کھیلتے دیکھنے کا منتظر ہوں۔ آپ کبھی نہیں جان سکتے کہ اگلا بڑا کرکٹر کہاں سے سامنے آئے گا۔‘‘
لیگ کا آغاز دہلی سے ہوگا اور اس کے بعد نیشنل کیپٹل ریجن میں پھیلائی جائے گی، جس میں گڑگاؤں، نوئیڈا، فریدآباد اور غازی آباد شامل ہیں۔ منتظمین کا منصوبہ آنے والے سیزن میں مقابلے میں مزید تعلیمی اداروں کو شامل کرنے اور بالآخر کالج لیگ کو بھی وسعت دینے کا ہے۔ ایک فٹبال لیگ شروع کرنے کی بھی منصوبہ بندی کی جارہی ہے۔
پی این پی اسپورٹس مینجمنٹ ایل ایل پی کے بانی اور سی ای او پرشانت مہتا اور فاؤنڈر ڈائریکٹر پارس مشرا نے کہا، ’’جب ہم نے اس لیگ کی منصوبہ بندی شروع کی تو ہم نے اس بات پر غور کیا کہ اسکولوں اور کالجوں میں کتنی کرکٹ کھیلی جاتی ہے اور طلبہ کو اپنے ادارے سے باہر باقاعدگی سے مقابلہ کرنے کے کتنے کم مواقع ملتے ہیں۔ کچھ بہت اچھے کھلاڑی ہیں جنہیں کھیلنے کے مزید مواقع ملنے چاہئیں۔ ہم 90 سے زیادہ اسکولوں کے ساتھ شروعات کررہے ہیں اور لیگ کے بڑھنے کے ساتھ مزید اداروں کو شامل کرنا چاہتے ہیں۔ خیال یہ ہے کہ اسے ایک سالانہ مقابلہ بنایا جائے، جس میں طلبہ حصہ لینے کے لیے پرجوش ہوں اور اسکولوں کو اس سے جڑنے پر فخر ہو۔ آنے والے برسوں میں ہم اسے کرکٹ سے آگے بھی لے جانا چاہتے ہیں۔‘‘
لیگ کا باضابطہ افتتاح اس کے بانیوں، لیگ کمشنر اور مدعو مہمانوں کی موجودگی میں کیا گیا۔ اس موقع پر مقابلے کے فارمیٹ، آئندہ سیزن اور لیگ کو وسعت دینے کے منصوبوں پر پریزنٹیشن دی گئی۔ 22 اکتوبر سے پہلے میچوں کے آغاز کے ساتھ ہی افتتاحی سیزن ایک ایسے مقابلے کی بنیاد رکھے گا جسے منتظمین دہلی-این سی آر کے نوجوان کرکٹرز کے لیے طویل مدتی پلیٹ فارم بنانے کی امید رکھتے ہیں۔
