خواتین کے 65 کلوگرام کوارٹر فائنل میں پروین نے ازبکستان کی نواباخور خامیدووا کو 5-0 سے شکست دے کر سیمی فائنل میں جگہ بنائی۔ ڈوپنگ کی خلاف ورزی کے سبب ہانگژو 2022 میں ان کا کانسی کا تمغہ واپس لے لیا گیا تھا، لیکن پروین نے شاندار واپسی کرتے ہوئے ایشین گیمز میں ایک اور تمغہ پکا کرلیا۔ انہوں نے مقابلے میں فاصلہ برقرار رکھتے ہوئے تیز حملے کیے اور باڈی شاٹس کے ساتھ چہرے پر جیب لگائے۔
ازبکستان کی باکسر نے بعد میں کاؤنٹر پنچ کی حکمت عملی اپنائی، لیکن پروین کی رفتار اور رسائی ان پر حاوی رہی۔ سیمی فائنل میں پروین کا مقابلہ چین کی لی شو سے ہوگا، جنہوں نے کوارٹر فائنل میں موجودہ عالمی چیمپئن قازقستان کی آئدا ابیکےیوا کو شکست دے کر بڑا الٹ پھیر کیا ہے۔
دولت مشترکہ کھیلوں کے چیمپئن انکش پنگھال نے مردوں کے 80 کلوگرام کوارٹر فائنل میں تاجکستان کے نیکروز سلیم وف کو 5-0 سے شکست دے کر سیمی فائنل میں جگہ بنائی اور ہندوستان کا پہلا باکسنگ تمغہ پکا کیا۔ 21 سالہ انکش نے تیز فٹ ورک، درست سیدھے پنچ اور بروقت کاؤنٹر پنچ کے ذریعے مقابلے پر گرفت بنائے رکھی۔ پہلے دو راؤنڈ میں برتری حاصل کرنے کے بعد انہوں نے آخری راؤنڈ میں بھی تحمل کا مظاہرہ کرتے ہوئے متفقہ فیصلے سے کامیابی حاصل کی۔
انکش نے ایشین گیمز میں اپنے سفر کا آغاز راؤنڈ آف 16 میں بحرین کے ہمسا ووگل کے خلاف 5-0 کی کامیابی سے کیا تھا اور اب تک ایک بھی راؤنڈ نہیں گنوایا ہے۔ وہ 80 کلوگرام زمرے میں دولت مشترکہ کھیلوں کا طلائی تمغہ جیت کر جاپان پہنچے تھے۔
نریندر بروال نے مردوں کے 90 کلوگرام کوارٹر فائنل میں تھائی لینڈ کے ادتھاپونگ سینگ تھیپ کو ریفری اسٹاپیج کے ذریعے پہلے راؤنڈ میں شکست دے کر تمغہ پکا کرلیا۔ نریندر نے آغاز ہی سے مقابلے پر کنٹرول رکھا۔ ادتھاپونگ کو دو بار اسٹینڈنگ کاؤنٹ ملا اور تیسری بار کاؤنٹ ملنے کے بعد ریفری نے مقابلہ روک دیا۔ مقابلہ دو منٹ سے بھی کم وقت میں ختم ہوگیا، جس کے ساتھ نریندر نے ہندوستان کے لیے دن کا تیسرا باکسنگ تمغہ پکا کردیا۔
