نائب وزیراعظم اور وزیرخارجہ اسحاق ڈار نے میڈیا بریفنگ میں کہا کہ پاکستان دل و جان سے ایران کے ساتھ کھڑا ہے۔ ملک کے اندر اس معاملے کو غلط رنگ دینا ٹھیک نہیں۔ فرض سمجھ کر ایران کی جنگ رکوانے کی کوشش کررہےہیں۔
اسحاق ڈار کا کہنا تھا کہ اعلانیہ اوربیک ڈور سفارت کاری کے ذریعے ایران کیلئے بہت متحرک ہیں۔ پاکستانی عوام کو بھی اس بات کو سمجھنا چاہیے، فریقین کو مذاکرات کی میز پر لانے کی کوشش کر رہے ہیں۔
نائب وزیراعظم کا کہنا تھا کہ پاکستان اور سعودی عرب کے درمیان دفاعی معاہدہ موجود ہے۔ پاکستان نے ایران سے رابطہ کر کے درخواست کی کہ وہ سعودی عرب پر حملے نہ کرے۔
اسحاق ڈار نے بتایا کہ جواب میں ایران نے ضمانت مانگی کہ سعودی سرزمین ان کے خلاف استعمال نہیں ہوگی، جس پر پاکستان کی درخواست پر سعودی عرب نے ایران کو مطلوبہ ضمانت فراہم کر دی ہے۔
