یوتھ کانگریس کے قومی انچارج منیش شرما نے جمعہ کو یہاں ایک بیان میں کہا کہ مودی حکومت کو آخرکار یہ تسلیم کرنے پر مجبور ہونا پڑا ہے کہ لوک سبھا میں اپوزیشن کے رہنما راہل گاندھی اور کانگریس پارٹی 2022 سے مسلسل اگنی پتھ اسکیم کی جن خامیوں کی نشاندہی کر رہے تھے، وہ درست تھیں۔ انہوں نے کہا کہ حکومت کے تازہ اعلان سے ثابت ہوتا ہے کہ اسکیم کا بنیادی ڈھانچہ نوجوانوں اور مسلح افواج کے بنیادی خدشات کو دور کرنے میں ناکام رہا ہے۔
مسٹر شرما نے کہاکہ ’’اگنی ویر اسکیم ملک کے نوجوانوں کے مستقبل اور ہماری مسلح افواج کے حفاظتی نظام کے ساتھ کیا گیا ایک غیر دانشمندانہ تجربہ تھا۔ اس میں تبدیلی کرنا اس بات کا ثبوت ہے کہ اسکیم کا بنیادی ڈھانچہ ہی ناقص تھا۔ حکومت چند ترمیمات کرکے اپنی جواب دہی سے بچ نہیں سکتی، کیونکہ اس نے فوج میں بھرتی ہونے کا خواب دیکھنے والی پوری نسل کی امیدوں اور آرزوؤں کو بڑا نقصان پہنچایا ہے۔‘‘
یوتھ کانگریس کے قومی صدر ادے بھانو چِب نے کہا کہ ملک کے نوجوانوں کو مستقل روزگار، عزت اور تحفظ چاہیے، نہ کہ ان کے مستقبل کے ساتھ بار بار تجربات۔ انہوں نے کہا کہ برسوں تک فوج میں بھرتی کی تیاری کرنے والے نوجوان جدوجہد کرتے رہے اور انصاف کا مطالبہ کرتے رہے، لیکن حکومت اپنی ضد پر اڑی رہی۔ اب جب اگنی ویروں کے پہلے دستے کی مدتِ ملازمت ختم ہونے کے قریب ہے، تو کیے گئے یہ فیصلے ان کے مستقبل کے حوالے سے مزید سنگین سوالات پیدا کرتے ہیں۔
مسٹر چِب نے کہا کہ ملک کی خدمت کے لیے اپنی زندگی کے اہم سال وقف کرنے والے نوجوانوں کو یقین دہانی، عزت اور مستقل فوجیوں کے برابر ملازمت کے فوائد ملنے چاہئیں۔ انہوں نے کہا کہ ہندوستانی یوتھ کانگریس ان نوجوانوں کی آواز کو ان سنا نہیں ہونے دے گی۔
یوتھ کانگریس نے کہا کہ ملازمت کی مدت 6 سال کرنے سے مستقل بھرتی، روزگار کا تحفظ، پنشن سے متعلق فوائد اور اگنی ویروں کے طویل مدتی پیشہ ورانہ مستقبل سے جڑے بنیادی خدشات دور نہیں ہوتے۔ تنظیم نے حکومت سے تمام اگنی ویروں کے مستقبل کے بارے میں صورت حال واضح کرنے اور مستقل بھرتی کے ساتھ محفوظ اور باعزت پیشہ ورانہ مستقبل یقینی بنانے کا مطالبہ کیا۔
