132 رنز کے ہدف کا تعاقب کرتے ہوئے ہندوستانی ٹیم نے 17 اوور میں 133 رنز بنا کر مقابلہ اپنے نام کر لیا۔ پہلے ہی اوور میں نومویلو سِبانڈا نے یستیکا بھاٹیا کو صفر پر آؤٹ کرکے ہندوستان کو پہلا جھٹکا دیا۔ اس کے بعد ہرلین دیول نے پرتیکا راول کے ساتھ دوسرے وکٹ کے لیے 58 رنز جوڑے۔ ہرلین 19 رنز بنا کر آؤٹ ہوئیں۔ پرتیکا نے 56 گیندوں میں چار چوکے اور تین چھکے لگا کر ناٹ آؤٹ 59 رنز بنائے، جبکہ شیفالی نے 26 گیندوں میں چھ چوکے اور تین چھکوں کی مدد سے ناٹ آؤٹ 51 رنز کی اننگز کھیلی۔
اس سے قبل ہندوستانی گیندبازوں نے زمبابوے کو 39.5 اوور میں 131 رنز پر آل آؤٹ کر دیا تھا۔ زمبابوے نے ٹاس جیت کر پہلے بلے بازی کی، لیکن 25 رنز تک اس کے تین وکٹ گر گئے۔ لورین فیری (صفر)، چِپو موگیری-تریپانو (چار) اور بیلَوڈ بیزا (ایک) رنز بنا کر آؤٹ ہوئیں۔ کپتان جوزفین نکومو اور موڈیسٹر موپاچیکوا نے چوتھے وکٹ کے لیے 27 رنز جوڑے، لیکن ویشنوی نے موپاچیکوا کو 37 رنز پر آؤٹ کر دیا۔ چِیزا دھورورو نے نکومو کے ساتھ پانچویں وکٹ کے لیے 43 رنز جوڑے، تاہم ویشنوی نے دھورورو (20) اور نائشا گوانزورا (10) کو بھی آؤٹ کیا۔ نکومو (35) کو کرانتی گاؤڈ نے آؤٹ کیا، جبکہ نومویلو سِبانڈا (چار) کے رن آؤٹ ہونے کے ساتھ زمبابوے کی اننگز 131 رنز پر ختم ہوگئی۔
ہندوستان کی جانب سے ویشنوی شرما نے پانچ وکٹ حاصل کیے، جبکہ کرانتی گاؤڈ اور سائیلی ساتگھرے نے دو، دو وکٹ لیے۔
