تہران، 21 جون (مسرت ڈاٹ کام) ایران کے سپریم لیڈر آیت اللہ علی خامنہ ای نے اسرائیل کی جانب سے قتل کی دھمکیوں کے بعد اپنے ممکنہ جانشینوں سے متعلق فیصلہ کرلیا۔

امریکی اخبار نیویارک ٹائمز کے مطابق ایرانی سپریم لیڈر نے اپنے ممکنہ جانشینوں کے حوالے سے فیصلہ کرلیا ہے، انھوں نے اس منصب کیلئے 3 علما کے نام تجویز کیے ہیں، ایرانی سپریم لیڈر کے صاحبزادے مجتبیٰ خامنہ ای ممکنہ جانشینوں میں شامل نہیں ہیں۔
خامنہ ای صرف ایک قابل اعتماد مشیر کے ذریعے پیغامات دیتے ہیں، ایرانی سپریم لیڈر نے الیکٹرونک پیغام رسانی ترک کردی ہے۔
نیویارک ٹائمز کی ایک رپورٹ کے مطابق ایرانی افواج کے سربراہ خامنہ ای نے اسرائیلی حملوں میں مارے جانے کی صورت میں اپنے فوجی کمانڈز کے سلسلے میں بھی چیدہ چیدہ لوگوں کو منتخب کیا ہے۔
رپورٹ میں خامنہ ای کے قریبی تین ایرانی اہلکاروں کا حوالہ دیتے ہوئے بتایا گیا ہے کہ سپریم لیڈر اب زیادہ تر اپنے ایک قابل اعتماد معاون کے ذریعے زیادہ کمانڈروں سے بات کرتے ہیں، وہ الیکٹرانک مواصلات کے ذرائع سے اجتناب کررہے ہیں تاکہ انھیں تلاش کرنا مشکل ہو۔
خیال رہے کہ آیت اللہ روح اللہ خمینی کے بعد ان کی جگہ متمکن ہونے والے آیت اللہ خامنہ ای 36 سال سے زائدعرصے سے ایران کے سپریم لیڈر ہیں۔