ٹی آر ٹی نیوز کے مطابق اسرائیل نے زمینی کارروائی کی تیاریوں کے ساتھ ساتھ رفح کے محفوظ زون پر فضائی حملوں کو بڑھا دیا ہے۔
اسرائیل کے رفح پر فضائی حملوں میں 28 فلسطینی جاں بحق ہوگئے جن میں 10 بچے بھی شامل ہیں جب کہ درجن سے زائد زخمی ہیں۔
خبر کے مطابق، وزیراعظم بن یامین نیتن یاہو کی جانب سے رفح پر حملے اور حماس کے خاتمے کے لیے مانگے گئے منصوبے کے چند گھنٹوں بعد ہی اسرائیلی فوج نے رفح پر وحشیانہ بمباری کردی۔
وزیراعظم نیتن یاہو نے فوج سے یہ بھی کہا تھا کہ وہ زمینی حملوں سے قبل جنوبی غزہ شہر سے لاکھوں لوگوں کے انخلاء کا منصوبہ بنائے اس اعلان کے بعد سے شہریوں میں خوف و ہراس پھیل گیا تھا۔
آج صبح ہونے والی اسرائیلی بمباری میں 28 فلسطینی جاں بحق اور درجن سے زائد زخمی ہوگئے۔
یاد رہے کہ غزہ کے 23 لاکھ شہریوں میں سے نصف سے زائد رفح میں پناہ لیے ہوئے ہوئے ہیں اور تقریباً روز ہی اسرائیل یہاں بمباری کر رہا ہے۔
غزہ کی وزارت صحت کے ترجمان اشرف القدرہ نے بتایا کہ خان یونس کے سب سے بڑے ناصر اسپتال پر اسرائیلی فوج نے فائرنگ کی جس میں ایک فلسطینی جاں بحق اور متعدد زخمی ہوگئے۔
اس اسپتال میں 300 طبی عملہ، 450 مریض اور 10 ہزار بے گھر افراد پناہ لے ہوئے ہیں۔
واضح رہے کہ 7 اکتوبر سے جاری وحشیانہ بمباری میں ہلاک ہونے والے فلسطینیوں کی تعداد 28 ہزار سے تجاوز کرگئی جب کہ 60 ہزار سے زائد زخمی ہیں۔
