مچھلی کے تاجروں نے بتایا کہ مزید 150 سے 200 ٹن ہلسا، جس کا زیادہ تر حصہ گجرات کے بھروچ سے حاصل کیا گیا ہے، آئندہ چند ہفتوں کے دوران ہندوستان سے بنگلہ دیش برآمد کیے جانے کی توقع ہے۔
بنگلہ دیش کو ہلسا کی برآمد ایسے وقت میں ہورہی ہے جب ملک میں رواں سال ہلسا کی پیداوار میں کمی کی اطلاعات ہیں، جس کے باعث مچھلی کے تاجروں نے مقبول مچھلی کی مقامی طلب پوری کرنے کے لیے ہندوستان کا رخ کیا ہے۔
تاجروں کے مطابق زیادہ تر کھیپ گجرات سے حاصل کی جاتی ہے اور بھروچ بندرگاہ کے ذریعے بھیجی جاتی ہے، جبکہ کچھ مچھلی مغربی بنگال کی ہاوڑہ تھوک مچھلی منڈی کے راستے بھی پہنچائی جاتی ہے۔
ڈیلی سن کے مطابق ہاوڑہ ہول سیل فش امپورٹرز ایسوسی ایشن کے سکریٹری سید انور مقصود نے کہا، ’’بنگلہ دیش نے پہلی بار ہندوستان سے ہلسا درآمد کی ہے۔ اس سال وہاں ہلسا کی قلت ہے۔‘‘
انہوں نے کہا، ’’گزشتہ دو ماہ میں تقریباً 500 ٹن ہلسا برآمد کی گئی ہے اور مزید 150 سے 200 ٹن آئندہ چند ہفتوں میں بھیجی جانی ہے۔‘‘
بنگلہ دیش نے مالی سال 2026-27 کے ابتدائی دو ماہ کے دوران بیناپول-پیٹراپول زمینی بندرگاہ کے ذریعے ہندوستان سے 352,787 کلوگرام ہلسا درآمد کی، جبکہ اگست میں درآمدات میں نمایاں اضافہ ہوا۔جولائی میں صرف 29,440 کلوگرام ہلسا ملک میں داخل ہوئی تھی، لیکن اگست میں یہ مقدار بڑھ کر 323,346 کلوگرام ہوگئی، جو گزشتہ ماہ کے مقابلے میں تقریباً 11 گنا زیادہ ہے۔
کسٹمز اور فشریز قرنطینہ دفتر کے اعداد و شمار کے مطابق کھیپوں کی اعلان کردہ مالیت تقریباً 6.92 کروڑ ٹکا (562,460 امریکی ڈالر) ہے۔
جولائی میں تین کمپنیوں نے ہلسا درآمد کی تھی۔ اگست میں یہ تعداد بڑھ کر 19 ہوگئی، جس کے ساتھ دونوں ماہ کے دوران بیناپول کے راستے ہلسا درآمد کرنے والی کمپنیوں کی مجموعی تعداد 22 ہوگئی۔
ایک زمانے میں بنگلہ دیش ہندوستان کو ہلسا برآمد کرتا تھا۔ بنگلہ دیش میں ہندوستان سے ہلسا کی درآمد نسبتاً حالیہ پیش رفت ہے اور اب اس کی بڑھتی ہوئی مقدار مقامی منڈیوں تک پہنچ رہی ہے۔
نیشنل بورڈ آف ریونیو کے اعداد و شمار کے مطابق بنگلہ دیش نے جولائی 2025 میں ہندوستان سے ہلسا درآمد کرنا شروع کی تھی، جب تقریباً 17,850 کلوگرام مچھلی ملک میں پہنچی تھی۔ اس کے بعد درآمدات میں تیزی سے اضافہ ہوا اور رواں مالی سال میں کئی لاکھ کلوگرام ہلسا بنگلہ دیش پہنچ چکی ہے۔
