کوچی، 11 اگست (یواین آئی) ہندوستانی اور امریکی بحریہ کوچی میں سدرن نیول کمانڈ میں 10 سے 14 اگست تک 5 روزہ دو طرفہ 'ایکسپلوسو آرڈیننس ڈسپوزل' (ای اوڈی) مشق کر رہی ہیں۔ اس کا مقصد دونوں بحریہ کی اسپیشلسٹ ڈائیونگ اور ای او ڈی ٹیموں کے درمیان باہمی تال میل کو بہتر بنانا ہے۔
10 اگست کو شروع ہونے والی اس مشق کا مقصد پیشہ ورانہ تعاون کو مضبوط کرنا اور موجودہ ای او ڈی چیلنجز سے نمٹنے میں مہارت کا تبادلہ کرنا ہے۔
اس پروگرام میں موضوع کے ماہرین کا تبادلہ، کراس ٹریننگ، آلات کا مظاہرہ اور صورتحال پر مبنی پریکٹیکل ٹریننگ شامل ہے۔ یہ دونوں بحریہ کے اہلکاروں کو موجودہ ای او ڈی تکنیکوں، جدید ترین ٹیکنالوجی اور بہترین آپریشنل طریقوں کے تبادلے کا موقع فراہم کرتا ہے۔
یہ مشق دونوں فریقوں کو ایک دوسرے کی صلاحیتوں، آپریشنل تصورات اور پیشہ ورانہ طریقوں کو بہتر طور پر سمجھنے میں مدد کرتی ہے، ساتھ ہی مل کر سیکھنے اور آپریشنل ہم آہنگی کو فروغ دیتی ہے۔
مشترکہ ٹریننگ اور بات چیت کے ذریعے، اس مشق سے اہلکاروں کو طریقہ کار کو بہتر بنانے، باہمی سمجھ بوجھ بڑھانے اور پیچیدہ اور بدلتے ہوئے ای او ڈی چیلنجز کا مؤثر طریقے سے مقابلہ کرنے کی صلاحیت کو مضبوط بنانے میں مدد ملنے کی امید ہے۔
ہندستانی اور امریکی بحریہ 2005 سے مشترکہ سالویج اور ای او ڈی مشقیں کر رہی ہیں۔ کوچی میں منعقد ہونے والی یہ مشق اس خاص دو طرفہ ٹریننگ پروگرام کا آٹھواں ایڈیشن ہے۔
یہ حالیہ مشق دونوں بحریہ کے باہمی تعاون کو بڑھانے، آپریشنل مہارت کو شیئر کرنے اور خاص بحری آپریشنز میں تعاون کو مضبوط بنانے کے مسلسل عزم کو ظاہر کرتی ہے۔
