سکسینہ کی جانب سے جاری نوٹیفکیشن کے بعد نوبرا، شام، چانگتھنگ، زانسکر اور دراس سمیت پانچ نئے اضلاع بنائے گئے ہیں، جس سے لداخ میں اضلاع کی تعداد دو سے بڑھ کر سات ہو گئی ہے۔
کارگل ڈیموکریٹک الائنس (کے ڈی اے) کے رہنما سجاد کارگلی نے کہا کہ اضلاع کی تعداد دو سے بڑھا کر سات کرنا محض انتظامی اصلاح نہیں بلکہ لداخ کے عوام کی متحدہ جمہوری اور ریاستی تحریک کو تقسیم کرنے کا ایک منظم قدم معلوم ہوتا ہے۔ انہوں نے الزام لگایا کہ یہ خاص طور پر بدھ اور مسلم برادریوں کی مشترکہ آواز کو کمزور کرنے کی کوشش ہے۔
لیہ سپریم باڈی (ایل اے بی) کے ساتھ، کے ڈی اے مرکز سے بات چیت کر رہا ہے اور لداخ کے لیے آئینی تحفظات جیسے ریاست کا درجہ، چھٹی شیڈول کا درجہ، روزگار کی حفاظت اور پارلیمانی نمائندگی کا مطالبہ کر رہا ہے۔
ایک بیان میں کارگلی نے دراس اور زانسکر جیسے علاقوں کو ضلع کا درجہ دیے جانے کا خیرمقدم کرتے ہوئے الزام لگایا کہ اس پورے عمل میں علاقائی حساسیت، آبادیاتی حقیقتوں اور منصفانہ نمائندگی کے اصولوں کو نظر انداز کیا گیا ہے۔
انہوں نے سانکو-سرو، بارسو اور شکر چکٹنہ کو ضلع کا درجہ دینے کا مطالبہ بھی دہرایا اور کہا کہ ان علاقوں کے باشندے بارہا یادداشتیں پیش کر چکے ہیں، مگر ان کی بات نظر انداز کی گئی ہے۔ ان علاقوں کے عوام کے ساتھ یکجہتی کا اظہار کرتے ہوئے کارگلی نے کہا کہ لداخ کو فرقہ وارانہ یا علاقائی بنیادوں پر تقسیم کرنے کی کسی بھی کوشش کی سخت مخالفت کی جائے گی، اور زور دیا کہ اس خطے کی طاقت اس کی یکجہتی اور تنوع میں مضمر ہے۔
دوسری جانب لداخ خودمختار پہاڑی ترقیاتی کونسل، کارگل کے چیف ایگزیکٹو کونسلر محمد جعفر اخون نے نئے اضلاع کے قیام کا خیرمقدم کیا، تاہم سانکو سب ڈویژن اور شکر چکٹن-شارگول سب ڈویژن کو شامل نہ کیے جانے پر سخت ناراضگی ظاہر کی۔انہوں نے کہاکہ “یہ نظراندازی انتہائی افسوسناک ہے اور اسے نظرانداز نہیں کیا جا سکتا۔”
انہوں نے مزید کہا کہ کارگل ضلع میں 80 دیہات باقی ہیں جبکہ لیہ میں 44 ہیں۔ ان کے مطابق آبادی اور جغرافیائی وسعت کے لحاظ سے کارگل کو زیادہ انتظامی سہولت کی ضرورت ہے، جبکہ نئے اضلاع میں دیہات کی تقسیم من مانی معلوم ہوتی ہے اور اس میں واضح جواز کی کمی ہے۔انہوں نے وزیر اعظم نریندر مودی، وزیر داخلہ امت شاہ اور لداخ کے لیفٹیننٹ گورنر سے اپیل کی کہ سانکو اور شکر چکٹن-شارگول کو فوری طور پر الگ اضلاع کا درجہ دیا جائے۔
لداخ سے رکن پارلیمنٹ محمد حنیفہ جان نے کہا کہ نئے اضلاع کا قیام نچلی سطح پر حکمرانی کو مضبوط بنانے اور علاقے میں ترقی کو تیز کرنے کی سمت ایک اہم قدم ہے۔انہوں نے کہاکہ “میں زور دے کر کہتا ہوں کہ سانکو-سرو اور شکر-چکٹن-شارگول لداخ کے سب سے زیادہ آبادی والے علاقوں میں شامل ہیں اور انہیں ضلع کا درجہ دینا نہایت ضروری ہے۔ ان کی بڑی آبادی اور وسیع جغرافیائی حیثیت کو دیکھتے ہوئے الگ ضلع کا قیام نہ صرف مناسب بلکہ انتہائی ضروری ہے۔ مجھے امید ہے کہ اس جائز مطالبے کو جلد پورا کیا جائے گا۔”
