مہر خبررساں ایجنسی کی رپورٹ کے مطابق، ایران کی فضائیہ کے ڈپٹی کمانڈر برائے آپریشنز بریگیڈیئر جنرل رضا خواجہ نے اعلان کیا ہے کہ ایران نے 12 روزہ جنگ کے دوران دشمن کے 196 طیارے اور ڈرون تباہ کیے۔

انہوں نے اس جنگ کو نیٹو اور مغربی ٹیکنالوجی کے ساتھ براہِ راست تصادم قرار دیا اور کہا کہ ایرانی فوج اور سپاہ پاسداران انقلاب نے نقصان کے باوجود آپریشنز کو بند نہیں کیا۔ اسرائیل کو کم از کم 33 ممالک کی مدد حاصل تھی اور حملوں میں کروز میزائل، بیلسٹک میزائل اور اسٹیلتھ فائٹرز استعمال کیے گئے۔  

انہوں نے واضح کیا کہ ایران کو اچانک حملے کا سامنا نہیں کرنا پڑا کیونکہ تمام فضائی دفاعی نظام پہلے ہی مغربی فضاؤں پر نظر رکھے ہوئے تھے۔ پہلی لہر میں کروز میزائل اور دیگر ہتھیار استعمال کیے گئے جبکہ ابتدائی طور پر کوئی فائٹر جیٹ شامل نہیں تھا۔  

انہوں نے کہا کہ اس جنگ میں ایرانی فضائیہ کے 35 اہلکار شہید ہوئے۔ جنگ کے دوران کئی ریٹائرڈ افسران نے رضاکارانہ طور پر دوبارہ خدمات پیش کیں۔ ہمارے بہادر اہلکار اپنی پوزیشن پر ڈٹے رہے حالانکہ انہیں معلوم تھا کہ ان کے ٹھکانے نشانہ بننے والے ہیں۔  

انہوں نے مزید کہا کہ ایرانی ساختہ فضائی دفاعی نظام نے بہترین کارکردگی دکھائی اور متعدد اسرائیلی ڈرونز، بشمول Heron، Hermes 450 اور Hermes 900 کو تباہ کیا گیا۔ ڈرون طیاروں کو مار گرانا دراصل دشمن کے اعصابی نظام کو نشانہ بنانا تھا۔