عآپ کے ریاستی صدر سوربھ بھاردواج نے جمعرات کے روز یہاں کہا کہ بی جے پی کا ارادہ دہلی میں عآپ کی طرف سے چلائی جانے والی تمام فلاحی اسکیموں کو بند کرنے کا ہے۔ اس کے لیے کرپشن کا بہانہ بنایا جا رہا ہے جب کہ سچ یہ ہے کہ آج تک کرپشن کا ایک بھی الزام ثابت نہیں ہو سکا ہے۔ پہلے محلہ کلینک کو بند کیا گیا۔ بسوں میں خواتین کا مفت سفر بند کیا جا رہا ہے۔ اسپتالوں میں مفت ادویات بند کر دی گئی ہیں۔ پانی پرائیویٹ ہاتھوں میں دے کر مفت پانی کی اسکیم بند ہونے جا رہی ہے۔ اس سلسلے میں دلت بچوں کی مفت کوچنگ کو روکنے کے لیے نیا ڈھونگ شروع کر دیا گیا ہے۔
انہوں نے کہا ہے کہ بی جے پی کی نام نہاد چار انجن والی حکومت نے گزشتہ چھ مہینوں میں قومی راجدھانی کا کام مکمل طور پر ٹھپ کر دیا ہے۔ پوری طاقت ہونے کے باوجود بی جے پی نے دہلی کے لوگوں کے لیے سرکاری مشینری کا غلط استعمال کرکے اے اے پی کے لیڈروں کے خلاف ایک کے بعد ایک کیس درج کرنے کے علاوہ کچھ نہیں کیا۔
مسٹر بھاردواج نے کہا کہ چھ مہینے گزر چکے ہیں، لیکن عام آدمی کے مسائل کو حل کرنے کے لیے ایک بھی ٹھوس قدم نہیں اٹھایا گیا ہے۔ دہلی کی خواتین کو 2500 روپے ماہانہ دینے کا وعدہ کیا گیا تھا۔ خواتین اب بھی ان پیسوں کے منتظر ہیں۔ اس وعدے کو پورا کرنے کے بجائے بی جے پی نے خواتین کو دھوکہ دیا ہے۔
انہوں نے کہا کہ دہلی والوں کی روزمرہ کی زندگی مشکلات سے بھری ہوئی ہے۔ گٹر کا پانی سڑکوں پر آرہا ہے، گھنٹوں تک بجلی کی کٹوتی ہو رہی ہے اور پرائیویٹ اسکولوں کی فیس میں بے تحاشا اضافہ اب معمول بن چکا ہے۔
اے اے پی کے لیڈر نے کہا کہ دہلی کے اسکولوں میں ہر روز بم کی دھمکیاں مل رہی ہیں، جس کی وجہ سے خوف و ہراس اور افراتفری کا ماحول ہے۔ انہوں نے سوال کیا کہ اسکولوں میں آئے روز نئی دھمکیاں مل رہی ہیں۔ کیا یہی بی جے پی کا راج ہے؟
