ورلڈ ایتھلیٹکس کی جانب سے جاری کردہ تازہ ترین رینکنگ میں نیرج ایک بار پھر دنیا کے نمبر ون نیزہ پھینکنے والے کھلاڑی بن گئے ہیں۔ ستمبر 2024 میں گرینیڈا کے اینڈرسن پیٹرس نے نیرج کو پیچھے چھوڑ کر پہلی پوزیشن حاصل کر لی تھی۔
اس ہفتے کے شروع میں جاری رینکنگ میں نیرج کے پاس اینڈرسن پیٹرس کے 1431 کے مقابلے میں 1445 رینکنگ پوائنٹس ہیں۔ جرمنی کے جولین ویبر رینکنگ میں تیسرے نمبر پر ہیں، جبکہ پیرس اولمپک گولڈ میڈلسٹ پاکستان کے ارشد ندیم 1370 پوائنٹس کے ساتھ چوتھے نمبر پر ہیں اور چیک ریپبلک کے جیکب وڈلیج ٹاپ فائیو کی فہرست میں شامل ہیں۔
نیرج کے اس سال مسلسل اچھے مظاہرے نے انہیں پھر سرفہرست رینک پر پہنچا دیا ہے۔
نیرج نے اپریل میں جنوبی افریقہ کے پوٹچیفسٹروم میں پوچ انویٹیشنل جیتا اور مئی میں دوحہ ڈائمنڈ لیگ میں دوسرا مقام حاصل کیا۔ انہوں نے دوحہ میں 90.23 میٹر کا نیا قومی ریکارڈ بنایا اور ممتاز 90 میٹر کلب میں داخل ہوئے۔ پولینڈ میں جانوس کوسوسنسکی میموریل میں وہ پھر دوسرے نمبر پر رہے، لیکن جون میں پیرس ڈائمنڈ لیگ میں جیت کی راہ پر لوٹ آئے۔ انہوں نے پیرس میں 88.16 میٹر کا بہترین مظاہرہ کیا۔ نیرج نے اس ہفتے کے شروع میں اوسٹراوا گولڈن اسپائیک کا ٹائٹل بھی اپنے نام کیا۔ اس سال اپنے تمام چار مقابلوں میں نیرج نے اینڈرسن پیٹرس کو پیچھے چھوڑ دیا ہے۔
دونوں سرفہرست ایتھلیٹس 5 جولائی کو بنگلورو میں این سی کلاسیک 2025 میں ایک بار پھر آمنے سامنے ہوں گے۔
