مسٹر شاہ نے ہفتہ کو یہاں عالمی یوم جگر (لیور ڈے) کے موقع پر انسٹی ٹیوٹ آف لیور اینڈ بلیری سائنسز کے زیر اہتمام منعقدہ پروگرام میں بطور مہمان خصوصی شرکت کی۔ اس موقع پر دہلی کے لیفٹیننٹ گورنر ونے کمار سکسینہ اور وزیر اعلیٰ ریکھا گپتا سمیت کئی معززین موجود تھے۔
انہوں نے کہا کہ وزیر اعظم نے ملک کے سامنے سال 2047 میں آزادی کی صد سالہ تقریب کے موقع پر ایک ترقی یافتہ ہندوستان بنانے کا ہدف رکھا ہے جو ہر میدان میں خود انحصار ہوگا اور دنیا کی قیادت کرے گا۔ انہوں نے کہا کہ ترقی یافتہ ہندوستان کے تصور کو بیمار ہو کر عملی شکل نہیں دی جا سکتی اس لئے یہ بہت ضروری ہے کہ ہر شہری صحت مند رہے۔
انہوں نے کہا کہ آج جگر کے عالمی دن کے موقع پر پورے ملک کے عوام کو اس بارے میں آگاہی، کوششیں اور مکمل معلومات رکھتے ہوئے اپنے جگر کو صحت مند رکھنے کا عہد کرنا چاہیے۔
مرکزی وزیر داخلہ نے کہا کہ انسٹی ٹیوٹ نے ایک خصوصی اسکیم شروع کی ہے اور یہ اختراعی پہل جگر کو صحت مند رکھنے کے حوالے سے ملک میں بیداری پھیلانے میں کامیاب ہوگی۔ انہوں نے کہا کہ ویدوں میں کہا گیا ہے کہ کھانا دوا ہے اور آج پوری دنیا اس تھیم کو قبول کر کے آگے بڑھ رہی ہے۔ انہوں نے کہا کہ 2014 سے 2025 تک کے 11 برسوں میں مودی حکومت نے ملک کے شہریوں کو ایک مجموعی نقطہ نظر کے ساتھ صحت مند بنانے کے لیے بہت سے پروگرام شروع کیے ہیں۔ انہوں نے کہا کہ آیوش کی وزارت ایسا نظام تیار کرنے کے لئے کام کر رہی ہے تاکہ ہم بیمار نہ ہوں۔ انہوں نے کہا کہ آج بڑے بڑے ایلوپیتھک اسپتال بھی آیوش ونگز کھول رہے ہیں۔ ورلڈ یوگا ڈے کے خیال میں خود انسان کی ذہنی اور جسمانی صحت شامل تھی۔
مرکزی وزیر داخلہ امت شاہ نے کہا کہ حکومت ملک میں صحت کی دیکھ بھال کے لیے ایک جامع نقطہ نظر کے ساتھ کام کر رہی ہے۔ انہوں نے عالمی یوم جگر کے موقع پر یہاں انسٹی ٹیوٹ آف لیور اینڈ بلیری سائنسز کے 'صحت مند جگر-صحت مند انڈیا' پروگرام میں کہا کہ گزشتہ 11 برسوں میں صحت کے بنیادی ڈھانچے میں نمایاں اضافہ ہوا ہے۔ انہوں نے کہا کہ صحت کا بجٹ بڑھ کر 1 لاکھ 27 ہزار کروڑ روپے ہو گیا ہے۔
مسٹر شاہ نے کہا کہ لوگوں میں جگر کی بیماریوں کے بارے میں بیداری بڑھائی جا ناچاہئے۔ انہوں نے اچھی صحت کو برقرار رکھنے کے لیے غذائیت سے بھرپور خوراک، مناسب نیند اور باقاعدہ ورزش پر خصوصی زور دیا۔ انہوں نے نوجوانوں سے درخواست کی کہ وہ اپنے جسم کے لیے دو گھنٹے ورزش اور چھ گھنٹے کی نیند اپنے دماغ کے لیے وقف کریں، تاکہ وہ اگلے 40-50 سال تک زندہ رہ سکیں اور ملک کی ترقی میں اپنا کردار ادا کر سکیں۔ انہوں نے کارپوریٹ سیکٹر سے بھی اپیل کی کہ وہ صحت مند جگر کی آگاہی مہم کو اپنی 'کارپوریٹ سماجی ذمہ داری' میں شامل کریں۔ اس موقع پر دہلی کے لیفٹیننٹ گورنر ونے کمار سکسینہ اور وزیر اعلیٰ ریکھا گپتا بھی موجود تھیں۔
ورلڈ ہیلتھ آرگنائزیشن کے اعداد و شمار کے مطابق جگر کی بیماریاں ہندوستان میں موت کی 10ویں سب سے عام وجہ ہیں۔ ہیپاٹائٹس بی، سی اور ہیپاٹو سیلولر کارسنوما جیسی بیماریاں اکثر طرز زندگی کی خراب عادات کی وجہ سے ہوتی ہیں، جن میں زیادہ الکحل اور منشیات کا استعمال، غیر صحت بخش غذاؤں کا طویل مدتی استعمال، غیر فعال طرز زندگی اور ورزش کی کمی شامل ہیں۔ اس سال جگر کے عالمی دن کا تھیم 'بھوجن ہی اوشدھی ' ہے۔
