تہران، 2 ستمبر (مسرت ڈاٹ کام) عراقی ذرائع کے مطابق اربیل اور سلیمانیہ میں امریکی فوجی تنصیبات پر میزائل اور ڈرون حملوں کے بعد شدید دھماکوں کی آوازیں سنی گئیں۔
مہر خبررساں ایجنسی کی رپورٹ کے مطابق، ایران کے خلاف امریکی فوج کی جارحانہ کارروائیوں کے جواب میں عراق کے شہر اربیل اور سلیمانیہ میں امریکی فوجی اڈوں اور تنصیبات کو نشانہ بنایا گیا، جس کے بعد علاقے میں متعدد دھماکوں کی آوازیں سنی گئیں۔
سپاہ پاسداران کے مطابق ایرانی مسلح افواج نے اربیل میں امریکی فوج سے متعلق ایک مرمتی و نگہداشت مرکز، فنی سازوسامان کے گوداموں اور جاسوسی غباروں کے رہنمائی نظام کو میزائل و ڈرون حملوں کے ذریعے تباہ کر دیا۔
دوسری جانب عرب میڈیا نے عراق کے شہر سلیمانیہ میں بھی شدید دھماکوں کی آوازیں سنائی دینے کی اطلاع دی ہے، تاہم ان دھماکوں کی مکمل نوعیت اور ممکنہ نقصانات کے بارے میں مزید تفصیلات سامنے نہیں آئی ہیں۔
ادھر بحرین کی خبر رساں ایجنسی نے دعوی کیا ہے کہ بحرین کے فضائی دفاعی نظام نے ملک کی فضائی حدود کے اوپر موجود ایرانی ڈرونز کو روک کر تباہ کر دیا۔
ایرانی آرمی نے آپریشن صاعقہ کے 29ویں مرحلے میں بحرین کے شیخ عیسی اڈے پر امریکی فوجی تنصیبات کو خودکش ڈرونز سے نشانہ بنایا۔
مہر خبررساں ایجنسی کی رپورٹ کے مطابق، ایرانی آرمی کے شعبۂ تعلقات عامہ نے اعلان کیا ہے کہ جنوبی علاقوں پر دشمن کی جارحیت کے جواب میں آپریشن صاعقہ کے 29ویں مرحلے کے دوران بحرین میں واقع شیخ عیسی اڈے پر امریکی فوج کی ریڈار تنصیبات اور فوجیوں کے اجتماع کے مراکز کو بڑی تعداد میں خودکش ڈرونز سے نشانہ بنایا گیا۔
بیان کے مطابق شیخ عیسی اڈا خلیج فارس کے خطے میں امریکہ کے اہم اور حساس فوجی اڈوں میں شمار ہوتا ہے، جہاں ہیلی کاپٹروں اور ڈرونز کے پرزہ جات کی مرمت و دیکھ بھال کے علاوہ جاسوسی طیارے بھی موجود رہتے ہیں۔
ایرانی فوج نے کہا ہے کہ اس نے دشمن کی کارروائیوں کا وسیع اور فیصلہ کن جواب دیا ہے اور جارح قوتوں سے سخت انتقام لینے کا سلسلہ جاری رہے گا۔
