نیوزی لینڈ کرکٹ کی جانب سے جاری بیان میں ولیمسن نے کہا کہ وہ کافی عرصے سے اس فیصلے پر غور کر رہے تھے، لیکن گزشتہ چند دنوں میں انہیں محسوس ہوا کہ اب ریٹائرمنٹ کا یہی مناسب وقت ہے۔
ولیمسن نے کہا، "بین الاقوامی کرکٹ کے لیے میرے اندر ہمیشہ مضبوط جذبہ اور بھوک رہی ہے، اور مجھے اس بات پر فخر ہے کہ میں نے نیوزی لینڈ کے لیے کھیلے گئے ہر میچ میں اپنی پوری توانائی صرف کی۔"
انہوں نے مزید کہا، "اگر میں اپنی مکمل صلاحیت کے ساتھ کھیل جاری نہ رکھ سکوں تو یہ درست نہیں ہوگا۔ میں خود اپنے فیصلے سے رخصت ہونے کو اپنی خوش نصیبی سمجھتا ہوں۔"
سابق کپتان نے نیوزی لینڈ کی موجودہ ٹیم پر اعتماد کا اظہار کرتے ہوئے کہا کہ ٹیم باصلاحیت کھلاڑیوں سے بھری ہوئی ہے اور مستقبل میں کچھ خاص کرنے کی صلاحیت رکھتی ہے۔
کین ولیمسن نے کہا، "یہ وہ ٹیم ہے جس سے میں محبت کرتا ہوں۔ اتنے طویل عرصے تک اس کا حصہ رہنا میرے لیے اعزاز کی بات ہے اور یہ ہمیشہ میرے دل کے قریب رہے گی۔"
ولیمسن نیوزی لینڈ کی اس ٹیم کا حصہ رہے جس نے مسلسل دو مرتبہ آئی سی سی کرکٹ ورلڈ کپ کے فائنل تک رسائی حاصل کی۔ 2019 کے ورلڈ کپ میں انہوں نے بطور کپتان ٹیم کی قیادت کی تھی اور اپنی شاندار کارکردگی پر پلیئر آف دی ٹورنامنٹ قرار پائے تھے۔
ان کی قیادت میں بلیک کیپس نے 2021 میں افتتاحی آئی سی سی ورلڈ ٹیسٹ چیمپئن شپ جیت کر تاریخ رقم کی تھی۔
ولیمسن کو نیوزی لینڈ کی کرکٹ تاریخ کے کامیاب ترین بلے بازوں اور کپتانوں میں شمار کیا جاتا ہے، اور ان کی ریٹائرمنٹ کو عالمی کرکٹ کے ایک اہم دور کے اختتام کے طور پر دیکھا جا رہا ہے۔
