راہل گاندھی نے اتوار کو سوشل میڈیا پلیٹ فارم ایکس پر اپنی مانگ دہراتے ہوئے کہا کہ میڈیکل داخلہ امتحان نیٹ امتحان کے سوالیہ پرچے بار بار لیک ہونے کے واقعات سے تعلیمی نظام پر سنگین سوالات کھڑے ہو رہے ہیں اور نریندر مودی کو اس مسئلے پر جواب دینا چاہیے۔
انہوں نے مزید لکھاکہ “2024 میں نیٹ امتحان کا پرچہ لیک ہوا تھا، لیکن امتحان منسوخ نہیں کیا گیا، وزیر نے استعفیٰ نہیں دیا، مرکزی تحقیقاتی بیورو (سی بی آئی) سے تحقیقات کروائی گئیں اور ایک کمیٹی تشکیل دی گئی۔ اب 2026 میں بھی پرچہ لیک ہو گیا، امتحان منسوخ کرنا پڑا، وزیر نے پھر بھی استعفیٰ نہیں دیا، سی بی آئی تحقیقات کر رہی ہے اور ایک اور کمیٹی بنانے کی بات ہو رہی ہے۔”
راہل گاندھی نے وزیر اعظم کو نشانہ بناتے ہوئے کہاکہ “مودی جی، ملک آپ سے کچھ سوال پوچھ رہا ہے، جواب دیجیے۔ بار بار پیپر لیک کیوں ہو رہے ہیں؟ اس ‘پریکشا پہ چرچا’ پر آپ خاموش کیوں ہیں؟ بار بار ناکام ہونے والے وزیر تعلیم کو آپ برطرف کیوں نہیں کر رہے؟”
کانگریس رہنما نے الزام لگایا کہ امتحانی نظام میں مسلسل بے ضابطگیوں کے باعث طلبہ اور والدین کا اعتماد کمزور ہو رہا ہے اور وزیر اعظم کو اس کی جواب دہی طے کرنی چاہیے۔
