وزیراعظم بنیامین نیتن یاہو کے دفتر کی جانب سے جاری بیان میں کہا گیا ہے کہ اسرائیل امریکہ اور ایران کے درمیان پاکستان کی ثالثی میں ہونے والی دو ہفتوں کی جنگ بندی کی حمایت کرتا ہے، تاہم اس معاہدے میں حزب اللہ کا ذکر شامل نہیں۔
بیان کے مطابق اسرائیل نے صدر ڈونلڈ ٹرمپ کے ایران کے خلاف حملے مؤخر کرنے کے فیصلے کی حمایت کی ہے، بشرطیکہ ایران فوری طور پر آبنائے ہرمز کو کھولے اور خطے میں حملے بند کرے۔
دوسری جانب لبنان میں قائم حزب اللہ، جسے امریکہ، اسرائیل اور خلیجی ممالک دہشت گرد تنظیم قرار دیتے ہیں، نے ایران کے ساتھ جنگ میں شمولیت کا اعلان کر رکھا ہے، جس کے بعد دونوں فریقین کے درمیان میزائل اور ڈرون حملوں کا سلسلہ جاری ہے۔
لبنان کی سرکاری خبر رساں ایجنسی کے مطابق جاری جھڑپوں کے نتیجے میں لاکھوں افراد بے گھر ہو چکے ہیں جبکہ اسرائیلی حملوں میں اب تک 1500 سے زائد افراد ہلاک ہو چکے ہیں۔
رپورٹس کے مطابق اسرائیل نے جنوبی لبنان اور ساحلی شہر ٹائر کے قریب حملے جاری رکھے، جہاں ایک رہائشی عمارت پر حملے میں چار افراد ہلاک ہو گئے، جبکہ ایک ڈرون حملے میں ایک گاڑی کو بھی نشانہ بنایا گیا۔
