بدھ کو کھیلے گئے پہلے ون ڈے میں بنگلہ دیشی فاسٹ بالر ناہید رانا کی قہر انگیز بالنگ (24 رنز دے کر 5 وکٹیں) کے سامنے پاکستانی بیٹنگ ریت کی دیوار ثابت ہوئی۔ پاکستان کی پوری ٹیم محض 114 رنز پر ڈھیر ہو گئی، جو بنگلہ دیش کے خلاف ون ڈے کرکٹ میں پاکستان کا کم ترین اسکور ہے۔ بنگلہ دیش نے یہ ہدف صرف 2 وکٹوں کے نقصان پر باآسانی حاصل کر کے سیریز میں 1-0 کی برتری حاصل کر لی۔
اطلاعات کے مطابق، پاکستان دوسرے ون ڈے میں اپنی بالنگ لائن کو مضبوط کرنے کے لیے محمد وسیم کی جگہ تجربہ کار فاسٹ بالر حارث رؤف کو شامل کرنے پر غور کر رہا ہے۔ کپتان شاہین شاہ آفریدی، محمد رضوان اور سلمان آغا جیسے سینئر کھلاڑیوں پر بھاری ذمہ داری ہوگی کہ وہ نوجوان ڈیبیو کرنے والے بلے بازوں کو سہارا دیں اور ٹیم کو مشکل صورتحال سے نکالیں۔
میزبان ٹیم اپنی گزشتہ فتح کے بعد انتہائی پُراعتماد ہے۔ کپتان مہدی حسن معراج کی باؤلنگ اور تنزید حسن کی جارحانہ بیٹنگ (67 رنز) نے بنگلہ دیشی ٹیم کو متوازن بنا دیا ہے۔ بنگلہ دیش کے پاس موقع ہے کہ وہ 2015 کے بعد پہلی بار پاکستان کے خلاف مسلسل دوسری ون ڈے سیریز جیتنے کا اعزاز حاصل کرے۔
میرپور کی پچ پہلے میچ میں فاسٹ بالرز کے لیے سازگار رہی تھی، جہاں باؤنس اور رفتار نے بلے بازوں کو کافی پریشان کیا۔ دوسرے ون ڈے کے لیے بھی اسی طرح کی وکٹ متوقع ہے۔ تاہم، محکمہ موسمیات نے جمعہ کو بارش کی پیش گوئی کی ہے، جس سے کھیل متاثر ہونے کا خدشہ ہے۔
ممکنہ الیون
پاکستان: صاحبزادہ فرحان، معاذ صداقت، شامل حسین، محمد رضوان (وکٹ کیپر)، سلمان آغا، حسین طلعت، عبد الصمد، فہیم اشرف، شاہین شاہ آفریدی (کپتان)، حارث رؤف/محمد وسیم، ابرار احمد۔
بنگلہ دیش: سیف حسن، تنزید حسن، نجم الحسین شانتو، لٹن داس، مہدی حسن معراج (کپتان)، توحید ہردوئے، عفیف حسین، رشاد حسین، تسکین احمد، ناہید رانا، مستفیض الرحمان۔
