نئی دہلی 26 اگست (مسرت ڈاٹ کام) ہندوستان اور کویت نے دوطرفہ تعلقات کا جامع جائزہ لینے کے ساتھ ساتھ دونوں ممالک کے درمیان اسٹریٹجک شراکت داری کو مزید گہرا کرنے پر تبادلہ خیال کیا ہے۔

وزارت خارجہ نے منگل کو بتایا کہ دونوں ممالک کے درمیان دفتر خارجہ مشاورت کا ساتواں دور آج یہاں منعقد ہوا۔ اجلاس کی مشترکہ صدارت وزارت خارجہ کے ایڈیشنل سیکرٹری (خلیج) اسیم آر مہاجن اور کویت کی وزارت خارجہ میں ایشیائی امور کے لیے معاون وزیر خارجہ (اے ایف ایم) سمیع عیسی جوہر حیات نے کی۔ مسٹر سمیع نے سکریٹری (سی پی وی اور او آئی اے) ارون کمار چٹرجی سے بھی ملاقات کی۔

ملاقات کے دوران فریقین نے دوطرفہ تعلقات کا جامع جائزہ لیا اور باہمی دلچسپی کے علاقائی اور بین الاقوامی امور پر تبادلہ خیال کیا۔

دونوں فریقوں نے سیاست، تجارت، سرمایہ کاری، دفاع، توانائی، ثقافت اور عوام سے عوام کے تعلقات سمیت مختلف شعبوں میں ہماری اسٹریٹجک شراکت داری کو مزید گہرا کرنے کے مختلف اقدامات اور مواقع پر تبادلہ خیال کیا۔ وہ دسمبر 2024 میں وزیر اعظم نریندر مودی کے دورہ کویت کے دوران دونوں ممالک کی قیادت کی رہنمائی میں تیار کیے گئے روڈ میپ کے نفاذ پر مل کر کام کرتے رہیں گے۔ مشترکہ تعاون کمیشن (جے سی سی) کے تحت مشترکہ ورکنگ گروپس (جے ڈبلیو جی) کے اجلاس جلد از جلد باہمی طور پر آسان تاریخوں پر منعقد کرنے کا فیصلہ کیا گیا۔

ہندوستان اور کویت کے درمیان قریبی تاریخی اور کثیر جہتی تعلقات ہیں۔ ہندوستان اور کویت کے درمیان دو طرفہ تجارت 10.2 بلین امریکی ڈالر سالانہ ہے۔ کویت میں 10 لاکھ سے زیادہ ہندوستانیوں کی موجودگی عوام سے عوام کے مضبوط رشتوں کا ثبوت ہے۔

فریقین نے کویت میں دفتر خارجہ کی مشاورت کا اگلا دور باہمی طور پر مناسب تاریخ پر منعقد کرنے پر اتفاق کیا۔