دہلی اسٹیٹ حج کمیٹی کی چیر پرسن کوثر جہاں نے اس پر فوری ردعمل ظاہر کرتے ہوے کہا کہ عازمین کرام کی جانب سے موصول متواتر درخواستو ں کی بنیاد پر تمام ریاستی حج کمیٹیوں کی تجاویز کے مطابق حج درخواست فارم جمع کرنے کی آخری تاریخ میں یہ توسیع ایک خوش آئند فیصلہ ہے اور اب ایسے تمام حج درخواست دہندگان جو کسی بھی وجہ سے ابھی تک درخواست نہیں جمع کرا سکے ہیں، اس سنہری موقع کا فائدہ اٹھاتے ہوئے جلد سے جلد اپنے فارم جمع کرادیں اور اس کے لیے دہلی اسٹیٹ حج کمیٹی کے دفتر،حج منزل میں عازمین حج کے لیے درخواست فارم بھرنے کی سہولیات بدستور جاری رہیں گی۔
حج کمیٹی کے ایگزیکٹو آفیسر اشفاق احمد عارفی نے تفصیلات جاری کر تے ہوئے بتایا کہ حج کمیٹی آف انڈیا کے سی ای او کی جانب سے ریاستی حج کمیٹیوں کے ایگزیکٹو آفیسران کے نام جاری گشتی مراسلہ کے ذریعے حج فارم جمع کرنے کی آخری تاریخ میں توسیع کی منظوری کی اطلاع موصول ہونے کے بعد دہلی اسٹیٹ حج کمیٹی کی طرف سے یہ اطلاع مختلف ذرائع سے عازمین تک پہونچا دی گئی ہیں۔ مزید یہ کہ اس کے بعد حج فارم بھرنے کی مدت میں آئندہ کوئی توسیع ممکن نہیں ہوگی اور 7/اگست کی آخری تاریخ کے بعد جلد ہی عازمین کے انتخاب کے لیے آن لائن قرعہ اندازی کا عمل مکمل کر لیا جائے گا اور قرعہ اندازی میں منتخب ہونے والے عازمین کو 20/اگست2025تک 1,52,300/-روپیے کی پیشگی رقم فوری طور پر جمع کرانی ہوگی۔
مسٹر عارفی کی جانب سے جاری دفتری تفصیلات کے مطابق دہلی اسٹیٹ حج کمیٹی میں اب تک3892حج درخواست فارم جمع ہوچکے ہیں۔ان درخواستوں میں مختصر مدتی حج کے لیے556جبکہ مخصوص زمرہ 65 سال اور اس سے زائد عمر کے 256، بنا محرم خواتین عازمین کے مخصوص زمرہ میں 17 اور عمومی زمرہ میں موصول درخواستوں کی تعداد3619 ہے۔
