کانگریس رہنماؤں نے ان پریس کانفرنسوں کے دوران کہا کہ پارٹی صدرملکارجن کھرگے اور راہل گاندھی طویل عرصے سے ذات پر مبنی مردم شماری کا مطالبہ اٹھاتے رہے ہیں۔ راہل گاندھی نے واضح طور پر کہا ہے کہ "جس کی جتنی آبادی، اس کا اتنا حق۔" انہوں نے کہا کہ ذات پر مبنی مردم شماری سے ملک میں مختلف سماجی طبقات کی واقعی صورتحال اور سرکاری نظام میں ان کی شراکت داری کا پتہ چل سکے گا۔ راجستھان کے سابق وزیراعلیٰ اشوک گہلوت نے احمد آباد میں پریس کانفرنس میں کہا کہ ذات پر مبنی مردم شماری ملک کے لیے بہت ضروری ہے۔ اس کے ہو جانے سے ملک میں لوگوں کی واقعی شراکت داری یقینی ہوگی اور تمام لوگ مل کر آگے بڑھ سکیں گے۔ انہوں نے کہا کہ ذات پر مبنی مردم شماری کا جو خاکہ پیش کیا گیا ہے، اس سے صاف ہے کہ مودی حکومت کی نیت ٹھیک نہیں ہے۔
حیدرآباد میں کانگریس کے قومی کوآرڈینیٹر کے راجو نے حیدرآباد میں پریس کانفرنس میں کہا کہ راہل گاندھی مسلسل ذات پر مبنی مردم شماری کا مسئلہ اٹھاتے رہے ہیں اور ان کے دباؤ کی وجہ سے مودی حکومت کو اس کا اعلان کرنا پڑا۔ انہوں نے الزام لگایا کہ جس طریقے سے اب ذات پر مبنی مردم شماری کرانے کی کوشش کی جا رہی ہے، وہ دیگر پسماندہ طبقات کے ساتھ دھوکہ ہے۔ کانگریس رہنماؤں نے کہا کہ مجوزہ خاکے میں عام زمرے اور دیگر پسماندہ طبقات کی ذاتوں کے لیے الگ الگ واضح کالم نہیں ہیں اور صرف ذات کا نام پوچھا جا رہا ہے۔ انہوں نے الزام لگایا کہ مودی حکومت اعداد و شمار کے ذریعے ملک کو گمراہ کر رہی ہے اور صرف ذات پر مبنی مردم شماری کرانے کا دکھاوا کر رہی ہے۔
پارٹی نے مطالبہ کیا کہ موجودہ تجویز کو منسوخ کر کے تمام ریاستی حکومتوں اور ماہرین کی رائے لینے کے بعد نئی تجویز تیار کی جائے۔ ساتھ ہی ذاتوں کی پہلے سے طے شدہ فہرست تیار کرنے اور ذات پر مبنی مردم شماری کے ہر مرحلے کے لیے وقت کی حد مقرر کرنے کا مطالبہ کیا۔
