رپورٹ کے مطابق ایڈمرل کوپر اور دیگر مشیروں کی اس سفارش نے صدر ڈونلڈ ٹرمپ کے اس فیصلے پر اثر ڈالا، جس کے تحت انہوں نے جمعہ کے روز ایران کے خلاف بمباری عارضی طور پر روکنے کا فیصلہ کیا۔
رپورٹ میں کہا گیا ہے کہ یہ پیش رفت اس بات کی عکاسی کرتی ہے کہ صدر ٹرمپ کے فوجی اور سویلین مشیر اس نتیجے پر پہنچ رہے ہیں کہ فوجی کارروائی، خصوصاً فضائی طاقت کے استعمال کے ذریعے مقاصد حاصل کرنے کی بھی ایک حد ہوتی ہے۔
ذرائع کے مطابق ایڈمرل کوپر نے اس ہفتے پینٹاگون اور وائٹ ہاؤس کے حکام کو بتایا کہ حالیہ فضائی حملوں نے بحری جہازوں پر حملہ کرنے کی ایران کی صلاحیت کو نمایاں طور پر کمزور کر دیا ہے۔ انہوں نے یہ بھی کہا کہ جن اہداف کو نشانہ بنانا مقصود تھا، ان میں سے بیشتر پر پہلے ہی حملے کیے جا چکے ہیں۔
اس سے قبل اتوار کے روز ایک امریکی نشریاتی ادارے نے علاقائی حکام کے حوالے سے دعویٰ کیا تھا کہ امریکہ نے ایران کے خلاف اپنے حملوں کا سلسلہ اس لیے روک دیا ہے تاکہ عمان کی ثالثی میں تہران کے ساتھ جاری مذاکرات متاثر نہ ہوں۔
ایران کی وزارتِ خارجہ نے بتایا کہ 24اور 25 جولائی کو تہران میں ایران اور عمان کے درمیان نائب وزرائے خارجہ کی سطح پر کئی دور کی بات چیت ہوئی، جس میں آبنائے ہرمز میں محفوظ بحری آمدورفت کے عمومی اصولوں اور عملی طریقۂ کار پر تبادلۂ خیال کیا گیا۔
وزارت کے مطابق آبنائے ہرمز میں جہاز رانی سے متعلق مذاکرات میں ایران اور عمان کے درمیان کچھ پیش رفت ہوئی ہے، تاہم آبی گزرگاہ کی مجموعی صورتِ حال میں فی الحال کوئی تبدیلی نہیں آئی ہے۔
