کبیر خان کی ہدایت کاری میں بننے والی اور سلمان خان فلمز کے بینر تلے تیار کی گئی 'بجرنگی بھائی جان' سال 2015 میں ریلیز ہوئی تھی۔ فلم میں سلمان خان، کرینہ کپور خان، ہرشالی ملہوترا اور نوازالدین صدیقی نے اہم کردار ادا کیے تھے۔ یہ فلم سلمان خان کے کیریئر کی کامیاب ترین اور مقبول ترین فلموں میں شمار کی جاتی ہے۔
فلم کی ریلیز کے 11 سال مکمل ہونے پر سلمان خان فلمز نے سوشل میڈیا پر ایک خصوصی کیروسل پوسٹ شیئر کی، جس میں فلم کے کئی یادگار مناظر شامل کیے گئے۔ پوسٹ کے ساتھ لکھا گیاکہ"ہر سوائپ ایک یاد ہے، ہر فریم ایک احساس ہے، ہر منظر ایک کہانی سناتا ہے، ہر لمحہ آج بھی زندہ ہے۔ 'بجرنگی بھائی جان' کے 11 سال مکمل ہونے کا جشن۔"
'بجرنگی بھائی جان' کی کہانی پون کمار چترویدی عرف بجرنگی کے گرد گھومتی ہے، جو ایک گونگی پاکستانی بچی منی کو اس کے خاندان سے ملانے کے لیے تمام سرحدوں اور مشکلات کو عبور کرتے ہوئے پاکستان تک کا سفر کرتا ہے۔
یہ فلم اپنی جذباتی کہانی، انسانی اقدار، محبت، ہمدردی اور انسانیت کے پیغام کی وجہ سے ناظرین کے دلوں میں خاص مقام بنانے میں کامیاب رہی۔ سلمان خان اور ہرشالی ملہوترا کے درمیان جذباتی تعلق اور نوازالدین صدیقی کی شاندار اداکاری کو بھی شائقین اور ناقدین نے بے حد سراہا۔
انسانیت اور سرحدوں سے بالاتر رشتوں کا پیغام دینے والی 'بجرنگی بھائی جان' آج بھی ہندوستانی سنیما کی مقبول ترین فلموں میں شمار کی جاتی ہے۔
