دوطرفہ تعلقات کو جغرافیائی سیاست (جیو پولیٹکس) کے زاویے سے دیکھنے سے انکار کرتے ہوئے شیشیر کھنال نے بات چیت، باہمی اعتماد اور مشترکہ خوشحالی پر زور دیا۔ ان کے بیانات سے ظاہر ہوتا ہے کہ نیپال کی نئی حکومت قوم پرستانہ نعروں کے بجائے عملی تعاون کو ترجیح دینا چاہتی ہے اور ہندوستان کو یہی یقین دلانا چاہتی ہے۔
نیپال اس بات کو یقینی بنانے کی کوشش کر رہا ہے کہ دیرینہ سرحدی تنازعات تجارت، نقل و حمل اور توانائی جیسے شعبوں میں بڑھتے ہوئے تعاون پر منفی اثر نہ ڈالیں۔ یہ وہ شعبے ہیں جنہوں نے حالیہ برسوں میں ہندوستان اور نیپال کے تعلقات کو نئی جہتیں دی ہیں۔
کھنال نے واضح کیا کہ نیپال ہندوستان کو "اکیسویں صدی کی جغرافیائی سیاست کے تعصبات اور حد سے زیادہ حساس نظریات" کے ذریعے دیکھنے سے انکار کرتا ہے اور سرحدی مسائل کو سفارتی ذرائع سے حل کرنے کا خواہاں ہے۔
وزیرِ اعظم بالندر شاہ کی قیادت میں نیپال کی حکومت معاشی سفارت کاری پر مبنی ایک عملی خارجہ پالیسی اختیار کر رہی ہے۔ حکومت ماضی کے سیاسی بوجھ کو پیچھے چھوڑ کر ایک نئی شروعات کرنا چاہتی ہے، تاہم سرحدی تنازعات کے حل کے لیے اپنی کوششیں جاری رکھے گی۔
تجزیہ کاروں کے مطابق نیپال نہیں چاہتا کہ ہندوستان کے ساتھ اس کے تعلقات کو بڑی طاقتوں کی رقابت کے تناظر میں دیکھا جائے، خصوصاً ایسے وقت میں جب جنوبی ایشیا میں اسٹریٹجک مقابلہ آرائی بڑھ رہی ہے۔ اس کے برعکس، کھٹمنڈو جغرافیہ، معاشی باہمی انحصار اور عوامی روابط کی بنیاد پر تعلقات کو آگے بڑھانا چاہتا ہے۔
کھنال نے اختلافات کو "کھلے دل" کے ساتھ حل کرنے پر زور دیتے ہوئے کہا کہ جب دونوں فریق خلوص کے ساتھ بیٹھتے ہیں تو کوئی مسئلہ اتنا بڑا نہیں ہوتا اور نہ ہی کوئی سرحدی تنازع اتنا پیچیدہ ہوتا ہے کہ اسے حل نہ کیا جا سکے۔
چند ہفتے قبل وزیرِ اعظم بالندر شاہ نے بھارت کے ساتھ سرحدی تنازع پر تبصرہ کیا تھا جس سے کچھ تنازع پیدا ہو گیا تھا۔ اسی وجہ سے سفارتی حلقے کھنال کے اس دورے پر گہری نظر رکھے ہوئے تھے۔ ان کے بیانات سے واضح تھا کہ وہ دونوں ممالک کے تعلقات کو بہتر بنانے کے لیے سنجیدہ کوششیں کر رہے ہیں۔انہوں نے کہاکہ "ہم بھارت کو اکیسویں صدی کی جغرافیائی سیاست کے تعصبات اور حد سے زیادہ حساس عینک سے دیکھنے سے صاف انکار کرتے ہیں۔"
انہوں نے مزید کہا کہ نیپال بھارت کی طرف کھلے دل، واضح وژن اور ایک شفاف ایجنڈے کے ساتھ دیکھتا ہے، اور وہ ایجنڈا ہے نیپال کی معاشی بحالی۔وزیرخارجہ ایس جے شنکر کی دعوت پر 5 جون سے شروع ہونے والا یہ دورہ مارچ میں اقتدار سنبھالنے کے بعد شاہ حکومت کی جانب سے اعلیٰ ترین سطح کا پہلا سفارتی رابطہ تھا۔
نیپال کی نیشنل انڈیپنڈنٹ پارٹی صاف شفاف حکمرانی، میرٹ اور جوابدہی کے وعدوں کے ساتھ اقتدار میں آئی ہے اور اسے ملک کی ایک نئی اصلاح پسند سیاسی قوت سمجھا جاتا ہے۔
