میڈیا رپورٹس کے مطابق، اس تقریب میں امریکی صدر ڈونلڈ ٹرمپ، ان کی اہلیہ میلانیا ٹرمپ، نائب صدر جے ڈی وینس اور کئی دیگر اعلیٰ حکام موجود تھے۔ فائرنگ شروع ہوتے ہی سیکرٹ سروس نے فوری کارروائی کرتے ہوئے صدر ٹرمپ اور دیگر رہنماؤں کو بحفاظت وہاں سے نکال لیا۔ خوش قسمتی سے اس واقعے میں کسی جانی نقصان کی اطلاع نہیں ملی۔
ہفتے کی رات پیش آنے والے اس واقعے کے بعد ڈونلڈ ٹرمپ نے 'ٹروتھ سوشل' پر ایک پوسٹ شیئر کی، جس میں انہوں نے امریکی سیکرٹ سروس اور مقامی سکیورٹی ایجنسیوں کی کارکردگی کو سراہتے ہوئے کہا کہ انہوں نے انتہائی تیزی اور بہادری سے کام کیا۔ انہوں نے تقریب میں دوبارہ شرکت کی خواہش ظاہر کی تاہم واضح کیا کہ وہ سکیورٹی حکام کی ہدایات پر عمل کریں گے۔
ٹرمپ نے مزید لکھا: "حملہ آور کو پکڑ لیا گیا ہے، میں نے مشورہ دیا تھا کہ پروگرام جاری رکھا جائے لیکن میں قانون نافذ کرنے والے اداروں کے فیصلے کا پابند ہوں۔ وہ جلد فیصلہ کریں گے، تاہم اب یہ شام ویسی نہیں رہے گی جیسی ہم نے سوچی تھی۔ ہمیں اسے دوبارہ نئے سرے سے ترتیب دینا ہوگا۔"
سوشل میڈیا پر وائرل ہونے والی ویڈیوز میں دیکھا جا سکتا ہے کہ فائرنگ کے وقت سیکرٹ سروس کے ایجنٹس نے صدر ٹرمپ کو گھیرے میں لے لیا، جبکہ وہاں موجود دیگر لوگ اپنی میزوں کے پیچھے چھپنے کی کوشش کر رہے تھے۔ اس دوران ہال میں "نیچے جھک جاؤ" کی آوازیں گونج رہی تھیں۔ ایجنٹس صدر ٹرمپ کو تیزی سے اسٹیج سے دور لے گئے، جس کے فوراً بعد بھاری اسلحے سے لیس اہلکاروں نے اسٹیج کا کنٹرول سنبھال لیا۔
واضح رہے کہ وائٹ ہاؤس کرسپانڈنٹس ڈنر ایک روایتی تقریب ہے جس کی میزبانی وائٹ ہاؤس کی کوریج کرنے والے صحافیوں کی ایسوسی ایشن کرتی ہے۔ یہ تقریب ہر سال واشنگٹن ہلٹن کے بڑے ہال میں منعقد کی جاتی ہے۔
