ریاض، 19 مارچ (مسرت ڈاٹ کام) سعودی وزارت دفاع نے ریاض کی جانب داغے گئے چار بیلسٹک میزائلوں کو تباہ کر دیا۔ اس دوران ایک میزائل کا ٹکڑا ریاض کے جنوب میں واقع ریفائنری کے قریب گر گیا۔ اس سے قبل بھی دارالحکومت میں 4 میزائل ناکام بنائے گئے تھے جس سے ایسے میزائلوں کی مجموعی تعداد 8 ہو گئی۔

سعودی شہری دفاع نے بتایا کہ ریاض کے رہائشی علاقے میں میزائل کا ملبہ گرنے سے ایشیائی قومیت کے 4 افراد زخمی ہوئے اور معمولی مالی نقصان ہوا۔

ترجمان نے واضح کیا کہ شہریوں کو نشانہ بنانا بین الاقوامی قوانین کی خلاف ورزی ہے۔ اس موقع پر طے شدہ طریقہ کار کے مطابق کارروائی کی گئی ہے۔ ان حملوں کا وقت وزارتی اجلاس کے آغاز کے ساتھ ہم آہنگ تھا۔

سعودی وزارت دفاع نے بتایا کہ ریاض کے مغرب میں سفارتی کالونی کے قریب دو ڈرونز بھی مار گرائے گئے ہیں۔ بریگیڈیئر جنرل ترکی المالکی نے کہا ہے کہ مشرقی صوبے کی جانب داغے گئے دو بیلسٹک میزائل اور 19 ڈرونز بھی تباہ کیے گئے۔