راہل نے کہا کہ رانچی میں کھیلنے کا تجربہ ہمیشہ یادگار رہا ہے، کیونکہ یہ شہر کرکٹ کے جنون سے جانا جاتا ہے۔ انہوں نے مسکراتے ہوئے کہا:’’یہ مہندر سنگھ دھونی کا شہر ہے… یہاں کرکٹ خون کی ہر رگ میں دوڑتا ہے۔ اگر مہندر سنگھ دھونی اسٹیڈیم میں میچ دیکھنے آتے ہیں، تو وہ لمحہ ہمارے لیے بے حد خاص ہوگا۔ یہاں کے شائقین کا جوش ہمیشہ زبردست رہتا ہے۔‘‘
راہل کے اس تبصرے پر پریس روم میں موجود صحافی بھی مسکرا اٹھے۔
وکٹ کیپنگ کے انتخاب، ٹیم کمبی نیشن اور اسپنرز کے خلاف کارکردگی کے بارے میں پوچھے گئے سوالات کے جواب میں راہل نے بتایا کہ ٹیم مینجمنٹ تمام پہلوؤں پر غور کر رہا ہے۔ رشبھ پنت کے کردار پر گفتگو کرتے ہوئے انہوں نے کہا:’’پنت بہترین فارم میں ہیں۔ یہ فیصلہ میچ والے دن ہوگا کہ وہ وکٹ کیپنگ کریں گے یا صرف بیٹنگ پر توجہ دیں گے۔‘‘
اسپن کے خلاف ہندوستانی ٹیم کی حالیہ دشواریوں پر بات کرتے ہوئے راہل نے کہا کہ ٹیم اس چیلنج سے بخوبی آگاہ ہے اور اس پہلو پر مسلسل کام کیا جا رہا ہے۔
انہوں نے کہا:’’ہم سینئر اور تجربہ کار بلے بازوں سے سیکھ رہے ہیں کہ اسپن کو زیادہ مؤثر انداز میں کیسے کھیلیں۔ پریکٹس سیشنز میں بھی اسپنرز پر خصوصی توجہ دی جا رہی ہے۔‘‘
بیٹنگ اور بولنگ کی حکمت عملی سے متعلق راہل کا کہنا تھا کہ ٹیم نے حالات کے مطابق اپنی منصوبہ بندی تیار کر لی ہے۔ ان کے مطابق، ابتدائی اوورز میں بیٹنگ مشکل ہو سکتی ہے، تاہم درمیانی اوورز میں رنز بنانے کے مواقع موجود رہیں گے۔
ڈیتھ اوورز کی بولنگ پر انہوں نے اعتماد ظاہر کرتے ہوئے کہا:’’ہماری بولنگ یونٹ مضبوط ہے اور ہر گیند باز اپنی ذمہ داری سے واقف ہے۔ ہمارا مقصد ابتدا ہی سے جنوبی افریقہ کی بیٹنگ لائن پر دباؤ بنانا ہے۔‘‘
ناظرین کی بڑی تعداد کے بارے میں راہل نے کہا کہ رانچی کا ماحول کھلاڑیوں کے لیے ہمیشہ توانائی بخش ہوتا ہے، دباؤ نہیں۔
’’ہم امید کرتے ہیں کہ اتوار کو پورا اسٹیڈیم ہندوستان کی حمایت میں گونجے گا۔‘‘
اتوار کے میچ کے لیے اسٹیڈیم میں سخت سیکورٹی انتظامات کیے گئے ہیں جبکہ تمام ٹکٹ پہلے ہی فروخت ہو چکی ہیں۔ شائقین اب اس پہلے ون ڈے کے سنسنی خیز مقابلے کے منتظر ہیں، جہاں پورا اسٹیڈیم ہر چوکے اور چھکے کے ساتھ کرکٹ کے جشن میں بدل جائے گا۔
