کراچی، 8 نومبر (مسرت ڈاٹ کام) – پاکستانی کرکٹ ٹیم کے سابق کپتان شاہد خان آفریدی نے سوشل میڈیا پر اپنے خلاف منفی مہمات اور پراپیگنڈے پر ردِ عمل دیتے ہوئے کہا ہے کہ وہ جھوٹ بول کر اپنی اولاد کو حرام نہیں کھلاسکتے۔ ایک تقریب کے دوران وائرل ویڈیو میں آفریدی سے پوچھا گیا کہ سوشل میڈیا پر لوگ آپ اور دیگر پاکستان کے ہیروز کے خلاف منفی باتیں کرتے ہیں، جس پر انہوں نے اپنی صاف گوئی سے اس رویے کی مذمت کی۔شاہد آفریدی نے جواب دیا کہ مجھے ان لوگوں کی اگر فکر ہوتی تو میں کبھی بھی بات نہیں کرتا، مجھے سوشل میڈیا پر جھوٹ بول کر زیادہ لائکس یا ویوز کمانے کا شوق نہیں ہے، میرا سوشل میڈیا میری کمائی کا ذریعہ نہیں ہے۔

ان کا کہنا تھا کہ میں سوشل میڈیا پر جھوٹ بول کر اپنی اولاد کو حرام نہیں کھلاسکتا، اس لیے میں سوشل میڈیا بہت زیادہ استعمال بھی نہیں کرتا۔

سابق کپتان نے کسی کا نام لیے بغیر کہا کہ کچھ لوگ ہیں جو رجسٹرڈ جھوٹیں ہیں، وہ کہتے تھے کہ ہم پاکستان چھوڑ کر کبھی نہیں جائیں گے، آج بھی ان کی باتیں ریکارڈ پر ہیں، لیکن میں نے خود ویڈیو میں دیکھا کہ گدھے کے اوپر گدھا بیٹھ کر جارہا تھا۔