دہلی کے عازمین کی سہولت کے لیے دہلی اسٹیٹ حج کمیٹی کے دفتر، حج منزل میں میڈیکل کیمپ کا اہتمام کیا گیا ہے جس میں دہلی حکومت کے ڈاکٹر کی جانب سے عازمین کو میڈیکل سرٹیفکیٹ جاری کیے جائیں گے۔ اس موقع پر حج کمیٹی کی چیئرپرسن کوثر جہاں نے اپنے ایک بیان میں کہا کہ دہلی اسٹیٹ حج کمیٹی عازمین کو فارم بھرنے سے لے کر حج پرواز تک ہر طرح کی خدمت ہر سال فراہم کرتی ہے اور حج منزل میں اس میڈیکل کیمپ کا انعقاد بھی ہماری اسی عزم اور خدمت کا ایک اہم حصہ ہے۔
دہلی اسٹیٹ حج کمیٹی کے ایگزیکٹو آفیسر اشفاق احمد عارفی نے میڈیکل کیمپ کی تفصیلات بتاتے ہوئے کہا کہ حج کمیٹی میں لگایا گیا یہ میڈیکل کیمپ 30 اگست تک جاری رہے گا اور اس کا وقت صبح 10 بجے سے دوپہر 30:2 بجے تک ہوگا۔ اس میڈیکل کیمپ کی سہولت حاصل کرنے کے لیے عازمین کو کسی بھی لیبارٹری سے اپنے کچھ ٹیسٹ جیسے سی بی سی، خون کا رینڈم ٹیسٹ، کے ایف ٹی، چھاتی کا ایکسرے اور ای سی جی کی رپورٹ لے کر حج منزل آنا ہوگا۔ انہوں نے بتایا کہ ہر گروپ کے تمام عازمین کو اپنی اپنی ٹیسٹ رپورٹ کے ساتھ خود آنا ہوگا ورنہ غیر موجودگی کی صورت میں کسی کا میڈیکل سرٹیفکیٹ جاری نہیں کیا جاسکتا۔ اس کے علاوہ حج عازمین اپنی ٹیسٹ رپورٹ کی بنیاد پر حج کمیٹی آف انڈیا کے مقررہ فارم میں کسی بھی سرکاری اسپتال، ڈسپنسری یا آیوشمان آروگیہ مندر سے بھی میڈیکل سرٹیفکیٹ بنوا سکتے ہیں۔ میڈیکل سرٹیفکیٹ کا پروفارما حج کمیٹی آف انڈیا کی ویب سائٹ یادہلی اسٹیٹ حج کمیٹی کے آفیشیل واٹس ایپ گروپ سے حاصل کیا جاسکتا ہے۔
