مہر خبررساں ایجنسی کی رپورٹ کے مطابق، ایران نے ریڈیوفارماسیوٹیکل (رادیو دواؤں) کے میدان میں زبردست کامیابی حاصل کرتے ہوئے 70 سے زائد مختلف رادیو دواؤں کی تیاری کے ذریعے نہ صرف اپنی داخلی ضروریات پوری کی ہیں، بلکہ دنیا کے سرفہرست تین ممالک میں اپنی جگہ بھی مستحکم کر لی ہے۔ اس وقت ایران 6,500 سے زائد نیوکلیئر میڈیکل مراکز کو یہ ادویات فراہم کر رہا ہے۔

معاونت برائے سائنسی، تکنیکی اور دانش‌بنیاد معیشت کے ادارے کے مطابق، سرطان جیسے مہلک مرض کے خلاف ابتدائی تشخیص سب سے اہم اور مشکل مرحلہ ہے۔ جب ٹیومر ابتدائی مراحل میں ہوتا ہے، تو خلیوں میں ظاہری تبدیلیاں نہیں آتیں، لیکن ان کے میٹابولزم میں نمایاں فرق آجاتا ہے۔ یہی وہ مرحلہ ہے جسے عام تشخیصی طریقے جیسے الٹراساؤنڈ یا ایکسرے شناخت نہیں کر پاتے۔

اس خلا کو پر کرنے کے لیے نیوکلیئر میڈیسن، خصوصاً جدید تصویری ٹیکنالوجیز جیسے PET اسکین، نمایاں کردار ادا کرتی ہیں۔ اس طریقے میں مریض کے جسم میں معمولی مقدار میں رادیو ایکٹو مواد داخل کیا جاتا ہے جو مخصوص خلیوں، مثلاً کینسر زدہ خلیوں، میں جا کر جمع ہوتا ہے۔ چونکہ یہ خلیے گلوکوز کی زیادہ مقدار استعمال کرتے ہیں، اس لیے گلوکوز جیسی مرکبات کے ذریعے نشاندہی ممکن ہو جاتی ہے، جو تصویری اسکین میں نمایاں طور پر نظر آتے ہیں۔

صرف تشخیص ہی نہیں، بلکہ ایران نے کینسر کے علاج میں بھی نمایاں کامیابیاں حاصل کی ہیں۔ جہاں روایتی ریڈیوتھراپی اردگرد کے صحت مند خلیوں کو بھی متاثر کرتی ہے، وہاں نئی نسل کی "مخصوص ہدف والی" ریڈیوتھراپی — جس میں بایوٹیکنالوجی کی مدد سے تیار کردہ اینٹی باڈیز رادیوایزوٹوپ کے ساتھ ملا کر براہِ راست ٹیومر پر اثرانداز ہوتی ہیں — خالصتاً کینسر زدہ خلیوں کو نشانہ بناتی ہے اور صحت مند خلیوں کو نقصان نہیں پہنچاتی۔

ماہرین کے مطابق، ایران کی یہ کامیابی نہ صرف طبی شعبے میں خود کفالت کی علامت ہے، بلکہ خطے کے دیگر ممالک کے لیے بھی امید کی کرن بن سکتی ہے، جو مہنگے درآمدی علاج پر انحصار کر رہے ہیں۔