191 رنز کے ہدف کے تعاقب میں اتری زمبابوے کی شروعات اچھی نہ رہی۔ ڈیون مائرز اور برائن بینیٹ کی اوپننگ جوڑی نے پہلی وکٹ کے لیے 21 رنز جوڑے۔ تیسرے اوور میں سوڑھی نے برائن بینیٹ (ایک) کو آؤٹ کر کے نیوزی لینڈ کو پہلی کامیابی دلائی۔ اس کے بعد سوڑھی نے کلائیو مڈانڈے (دو) اور ڈیون مائرز (22) کو بولڈ کر کے پویلین واپس بھیج دیا۔
کپتان سکندر رضا (نو) کو میٹ ہنری نے ایل بی ڈبلیو کیا اور ریان برل (پانچ) کو مائیکل بریسویل نے اپنی ہی گیند پر کیچ آؤٹ کیا۔ اس کے بعد ٹونی منیونگا اور تاشنگا موسکیوا نے زمبابوے کی اننگز کو سنبھالتے ہوئے 95 کے اسکور تک پہنچایا۔ 14ویں اوور میں سوڑھی نے ٹونی منیونگا (30 گیندوں پر 40) کو آؤٹ کر کے زمبابوے کی امیدوں کو دھچکا دیا۔ ویلنگٹن مساکاڈزا (دو) اور تاشنگا موسکیوا (21) رنز بنا کر آؤٹ ہوئے۔ نیوزی لینڈ نے 18.5 اوورز میں زمبابوے کو 130 کے اسکور پر سمیٹ کر 60 رنز سے میچ جیت لیا۔
نیوزی لینڈ کی طرف سے ایش سوڑھی نے 12 رنز دے کر چار وکٹیں لیں۔ میٹ ہنری کو دو وکٹیں ملیں۔ زکری فاکس، ولیم اورورک، اور مائیکل بریسویل نے ایک ایک بلے باز کو آؤٹ کیا۔
اس سے قبل آج یہاں نیوزی لینڈ نے ٹاس جیت کر پہلے بلے بازی کرنے کا فیصلہ کیا۔ بلے بازی کے لیے اتری نیوزی لینڈ کی شروعات اچھی نہ رہی اور اس نے تیسرے ہی اوور میں ٹم رابنسن (10) کی وکٹ گنوائی۔ انہیں رچرڈ اینگراوا نے آؤٹ کیا۔ اس کے بعد بیٹنگ کے لیے آئے رچن رویندر نے ٹم سیفرٹ کے ساتھ اننگز کو سنبھالا۔ دونوں بلے بازوں کے درمیان دوسری وکٹ کے لیے 108 رنز کی شراکت داری ہوئی۔
ٹی ماپوسا نے 14ویں اوور میں رچن رویندر کو آؤٹ کر کے اس شراکت کا خاتمہ کیا۔ رچن رویندر نے 39 گیندوں پر سات چوکوں اور دو چھکوں کی مدد سے 63 رنز بنائے۔ اسی اوور میں ماپوسا نے مارک چیپ مین (صفر) کو بھی آؤٹ کر کے پویلین واپس بھیج دیا۔ نیوزی لینڈ کی چوتھی وکٹ ٹم سیفرٹ کی صورت میں 153 کے اسکور پر گری۔ ٹم سیفرٹ نے 45 گیندوں پر نو چوکوں اور ایک چھکے کی مدد سے 75 رنز کی اننگز کھیلی۔ انہیں رچرڈ اینگراوا نے آؤٹ کیا۔
بیون جیکبز (صفر) اور کپتان مچل سینٹنر (سات) کو رچرڈ اینگراوا نے اپنا شکار بنایا۔ نیوزی لینڈ کی ٹیم نے مقررہ 20 اوورز میں چھ وکٹوں پر 190 رنز کا اسکور بنایا۔ زمبابوے کی طرف سے رچرڈ اینگراوا نے 34 رنز دے کر چار وکٹیں لیں۔ ٹی ماپوسا کو دو وکٹیں ملیں۔
