تہران، 2 جولائی (مسرت ڈاٹ کام) جنرل وحیدی نے کہا کہ ایران کی میزائل قوت مکمل طور پر تیار ہے اور اگر صہیونی حکومت نے دوبارہ جارحیت کی تو ’قاسم بصیر‘ سمیت تباہ کن ہتھیاروں کے ذریعے فوری اور فیصلہ کن جواب دیا جائے گا۔

مہر خبررساں ایجنسی کی رپورٹ کے مطابق، سپاہ پاسداران انقلاب اسلامی کے سینیئر کمانڈر بریگیڈیئر جنرل احمد وحیدی نے صہیونی حکومت کی جانب سے جنگ بندی کی ممکنہ خلاف ورزی اور اس کے جواب میں سپاہ کے ردعمل کے بارے میں کہا کہ ایران کی میزائل طاقت صہیونی دشمن کا مقابلہ کرنے کے لیے بہترین حالت میں ہے۔

جنرل وحیدی نے مزید کہا کہ لشکر اسلام نے صہیونی حکومت کو جواب دینے کے لیے وسیع تیاریاں کررکھی ہیں اور وہ دشمن کو سختی سے کچلنے کی صلاحیت رکھتے ہیں۔

جب ان سے پوچھا گیا کہ اگر صہیونی حکومت دوبارہ جارحیت کرے تو کیا قاسم بصیر میزائل استعمال کیا جائے گا، تو انہوں نے جواب دیا کہ ہم نے دشمن کو جواب دینے کے لیے مختلف وسائل تیار کر رکھے ہیں، جنہیں دشمن کی کسی بھی جارحیت کی صورت میں استعمال کیا جائے گا۔

سپاہ پاسداران انقلاب کے مشیر نے ایک اور سوال کے جواب میں کہ آیا امریکہ کی طرف سے جنگ بندی برقرار رکھنے کے حوالے سے کوئی اشارہ ملا ہے یا نہیں، کہا کہ ہم نے امریکہ سے سوائے تجاوز، خیانت اور بدعہدی کے کچھ نہیں دیکھا۔