اے اے پی کے سینئر لیڈر اور دہلی کے کابینہ وزیر آتشی نے اتوار کو ایک پریس کانفرنس میں کہا کہ مرکزی تفتیشی بیورو (سی بی آئی) کی گرفتاری کے ذریعے بی جے پی جیل میں بند مسٹر اروند کیجریوال کی صحت کو مکمل طور پر خراب کرنے کی سازش کر رہی ہے۔ بی جے پی کو معلوم تھا کہ نچلی عدالت کے بعد مسٹر کیجریوال کو سپریم کورٹ سے بھی ضمانت مل جائے گی، اس لیے اس نے انہیں جعلی سی بی آئی کیس میں گرفتار کر لیا۔
محترمہ آتشی نے کہا کہ جیل میں مناسب دیکھ بھال نہ ہونے کی وجہ سے کئی بار مسٹر اروند کیجریوال کا شوگر لیول رات کو سوتے وقت خطرناک حد تک 50 سے نیچے پہنچ جاتا ہے۔ ڈاکٹروں کے مطابق شوگر لیول اس حد تک گرنا برین اسٹروک اور کومے کا باعث بن سکتا ہے۔
انہوں نے کہا کہ ڈکٹیٹر اپنے مخالفین کو جیلوں میں رکھ کر ان کی صحت خراب کرکے انہیں مارنے کی کوشش کرتے ہیں۔ یہی کچھ مسٹر اروند کیجریوال کے ساتھ تہاڑ میں ہو رہا ہے۔ انہوں نے کہا کہ جیل میں اروند کیجریوال کی جان کو خطرہ ہے۔ اگر انہیں کچھ ہوا تو اس کی ذمہ دار بی جے پی پر ہوگی۔
اے اے پی لیڈر نے کہا کہ بی جے پی کی سازش صرف مسٹر اروند کیجریوال کو جیل میں ڈالنے کی نہیں ہے۔ بی جے پی کی سازش مسٹر اروند کیجریوال کو مارنے کی ہے۔
