Masarrat
Masarrat Urdu

کرناٹک میں کارروائی کے دوران کتاب ’’بسوا منٹپا‘‘ کے مصنف روی ہنج کو کوچی ہوائی اڈے پر حراست میں لیا گیا

Thumb

کرناٹک میں کارروائی کے دوران کتاب ’’بسوا منٹپا‘‘ کے مصنف روی ہنج کو کوچی ہوائی اڈے پر حراست میں لیا گیا

بنگلورو، 21 نومبر (مسرت ڈاٹ کام) کنڑ مصنف روی ہنج، جن کی متنازع کتاب ’’بسوا منٹپا‘‘ (Basava Mantapa) نے لنگایت تنظیموں میں بڑے پیمانے پر احتجاج اور کرناٹک میں سیاسی تنازع پیدا کردیا ہے، کو ریاستی کابینہ کی جانب سے کتاب کی کاپیاں ضبط کرنے اور قانونی کارروائی شروع کرنے کے فیصلے کے چند روز بعد ہفتہ کو کوچی ہوائی اڈے پر پولیس نے حراست میں لے لیا۔

شکاگو میں مقیم روی ہنج، جو ہندوستان کے دورے پر آئے ہوئے تھے، کا سراغ لگانے کے بعد ہوائی اڈے کی پولیس نے انہیں حراست میں لے لیا۔ بیلگاوی اور بنگلورو کے پولیس افسران نے ان کی گرفتاری کی تصدیق کی ہے۔ کوچی ہوائی اڈے کی پولیس نے مزید کارروائی کے لیے بیلگاوی پولیس کو اطلاع دی۔

مصنف کے خلاف فوجداری مقدمات درج ہونے اور پولیس نوٹس جاری کیے جانے کے بعد ان کے مبینہ طور پر رابطے سے باہر ہوجانے کے پیش نظر ان کے خلاف لک آؤٹ نوٹس جاری کیا گیا تھا۔ ان کی حراست کو کتاب سے متعلق بڑھتے ہوئے تنازع میں ایک اہم پیش رفت قرار دیا جارہا ہے۔ یہ کتاب ان کے پہلے شائع شدہ کنڑ کالموں کا مجموعہ ہے، جس پر بسونا (بسونّا) کی توہین کرنے اور لنگایت برادری کے مذہبی جذبات کو مجروح کرنے کے الزامات عائد کیے گئے ہیں۔

کرناٹک کابینہ نے حال ہی میں برادری کی تنظیموں اور سیاسی رہنماؤں کی جانب سے مصنف اور ناشر کے خلاف کارروائی کے بڑھتے ہوئے مطالبات کے بعد کتاب ’’بسوا منٹپا‘‘ کی کاپیاں ضبط کرنے اور قانونی کارروائی شروع کرنے کا فیصلہ کیا تھا۔

 

Ads