بلاوایو، 15 جولائی (مسرت ڈاٹ کام) پلیئر آف دی میچ رچرڈ انگاراوا کی شاندار گیندبازی کی بدولت زمبابوے نے پہلے ٹی-20 بین الاقوامی میچ میں بدھ کے روز بنگلہ دیش کو 32 رنز سے شکست دے کر تین میچوں کی سیریز میں 0-1 کی برتری حاصل کر لی۔ زمبابوے نے پہلے بلے بازی کرتے ہوئے چھ وکٹوں پر 170 رنز بنائے، جس کے جواب میں بنگلہ دیش کی پوری ٹیم 19 اوورز میں 138 رن پر ڈھیر ہوگئی۔ زمبابوے کو برائن بینیٹ کے 44 رنز کی بدولت مضبوط آغاز ملا اور ٹیم ایک وقت 190 رنز کے قریب پہنچتی دکھائی دے رہی تھی، تاہم بنگلہ دیشی گیندبازوں نے واپسی کرتے ہوئے رن کی رفتار پر قابو پا لیا۔ اننگز کے آخری اوور میں ایونز نے رانا کے خلاف چار چوکے لگا کر اپنی ٹیم کو اہم رفتار فراہم کی۔ ہدف کے تعاقب میں رچرڈ انگاراوا (چار وکٹ) اور بلیسنگ مزرابانی (چار وکٹ) کی نئی گیند سے تباہ کن گیندبازی کے سامنے بنگلہ دیش کی ابتدائی صف جلد ہی بکھر گئی۔ اس کے بعد توحید ہردوئے اور یاسر علی نے اہم شراکت قائم کرکے ٹیم کو سنبھالنے کی کوشش کی، لیکن کپتان توحید ہردوئے 14 رنز بنانے کے بعد باؤنڈری پر کیچ دے بیٹھے۔ یاسر علی نے سب سے زیادہ 54 رنز بنائے، تاہم وہ اپنی ٹیم کو شکست سے نہ بچا سکے۔