این ٹی اے نے منگل کو بتایا کہ وزارتِ الیکٹرانکس و اطلاعاتی ٹیکنالوجی نے انفارمیشن ٹیکنالوجی ایکٹ کی دفعہ 69اے کے تحت ہندوستان میں ٹیلیگرام تک رسائی کو 22 جون تک محدود کرنے کی ہدایت جاری کی ہے۔ اس کے علاوہ 30 جون تک پلیٹ فارم پر پہلے سے شائع شدہ پیغامات میں ترمیم (میسج ایڈیٹنگ) کی سہولت بھی غیر فعال کرنے کے احکامات دیے گئے ہیں۔
این ٹی اے نے کہا کہ یہ کارروائی ان منظم گروہوں کے خلاف کی گئی ہے جو ٹیلیگرام کے ذریعے نیٹ کے دوبارہ امتحان کے سوالیہ پرچے فراہم کرنے کے جھوٹے دعوے کرکے امیدواروں اور ان کے اہلِ خانہ کو دھوکہ دے رہے تھے۔ ایجنسی کے مطابق وزارتِ داخلہ کے تحت کام کرنے والے انڈین سائبر کرائم کوآرڈینیشن سینٹر (I4سی)، مختلف ریاستوں کی پولیس اور وزارتِ الیکٹرانکس و اطلاعاتی ٹیکنالوجی کے تعاون سے ایسے متعدد چینلز، گروپس اور بوٹس کے خلاف مسلسل کارروائی کی گئی جو جعلی اور گمراہ کن مواد پھیلا رہے تھے۔
این ٹی اے اور محکمۂ اعلیٰ تعلیم نے حکومت کی توجہ اس جانب مبذول کرائی تھی کہ صرف انفرادی چینلز کو ہٹانا کافی نہیں ہے۔ اس کے بعد پلیٹ فارم کی سطح پر محدود اور وقتی پابندی عائد کرنے کا فیصلہ کیا گیا۔ این ٹی اے نے واضح کیا کہ یہ اقدام آخری چارۂ کار کے طور پر اٹھایا گیا ہے اور اس کا مقصد صرف امتحانی مدت کے دوران عوامی نظم و نسق اور امتحان کی شفافیت کو برقرار رکھنا ہے۔
این ٹی اے نے یقین دہانی کرائی ہے کہ نیٹ (یو جی) 2026 کا دوبارہ امتحان 21 جون کو طے شدہ پروگرام کے مطابق منعقد ہوگا اور امتحان کی سیکیورٹی مکمل طور پر یقینی بنائی گئی ہے۔ ایجنسی نے طلبہ اور والدین سے اپیل کی ہے کہ وہ کسی بھی غیر مصدقہ معلومات پر یقین نہ کریں اور صرف سرکاری ویب سائٹ اور این ٹی اے کے تصدیق شدہ ذرائع سے ہی معلومات حاصل کریں۔
این ٹی اے نے یہ بھی مشورہ دیا ہے کہ کسی بھی قسم کی آن لائن دھوکہ دہی یا مشتبہ سرگرمی کی اطلاع قومی سائبر کرائم ہیلپ لائن 1930 یا سائبر کرائم پورٹل پر دی جائے۔
