نئی دہلی، 3 مئی (مسرت ڈاٹ کام) دہلی کے شاہدرہ میں اتوار کی صبح قریب چار بجے ایک چار منزلہ عمارت میں زبردست آگ لگنے سے کم سے کم نو لوگوں کی موت ہو گئی۔

عمارت سے تقریباً 15 لوگوں کو محفوظ باہر نکالا گیا۔ زخمیوں کو اسپتال میں داخل کیا گیا جہاں ان کا علاج جاری ہے۔ ابتدائی اطلاعات کے مطابق، آگ ایئر کنڈیشنر کی وجہ سے لگی، حالانکہ درست وجہ کی ابھی تک باضابطہ تصدیق نہیں ہوئی ہے۔

ایک سینئر پولیس افسر نے کہا کہ پولیس کو صبح چار بجے آگ لگنے کی اطلاع ملی تھی، جس کے بعد فائر بریگیڈ کی گاڑیاں موقع پر پہنچیں اور آگ پر قابو پا لیا گیا۔ جائے وقوعہ پر مزید تحقیقات اور راحت و بچاؤ کا کام جاری ہے۔