کمیشن نے ایک پریس ریلیز میں بتایا کہ 15 مارچ کو انتخابات کے اعلان کے ساتھ ہی تمام متعلقہ علاقوں میں مثالی ضابطہ اخلاق نافذ کر دیا گیا تھا۔ اس کے بعد انتخابات کو منصفانہ، پیسے اور خوف سے پاک اور شفاف رکھنے کے لیے نگرانی اور نفاذ کی کارروائیاں جاری ہیں۔ اس دوران مغربی بنگال میں 27.48 کروڑ روپے کی نقدی، 102.45 کروڑ روپے مالیت کی 39.31 لاکھ لیٹر شراب، 108.11 کروڑ روپے کی منشیات، 55.88 کروڑ روپے کی قیمتی دھاتیں اور 178.83 کروڑ روپے مالیت کے تحائف ضبط کیے گئے ہیں۔ ریاست میں اب تک مجموعی طور پر 472.89 کروڑ روپے کی نقدی، شراب اور قیمتی اشیاء ضبط کی گئی ہیں۔
اسی طرح تمل ناڈو میں 100.19 کروڑ روپے کی نقدی، 3.85 کروڑ روپے مالیت کی 1.18 لاکھ لیٹر شراب، 76.72 کروڑ روپے کی منشیات، 159.31 کروڑ روپے کی قیمتی دھاتیں اور 259.14 کروڑ روپے کے تحائف ضبط کیے گئے ہیں۔ ریاست میں ضبط شدہ نقدی، شراب اور سامان کی کل مالیت 599.4 کروڑ روپے لگائی گئی ہے۔ الیکشن کمیشن نے ریاستوں کے چیف الیکٹورل آفیسرز، پولیس اور انتظامیہ کے حکام کو ہدایات دے رکھی ہیں کہ وہ انتخابات کو لالچ سے پاک رکھنے کے لیے مکمل مستعدی سے کام لیں۔
کمیشن کی جانب سے مغربی بنگال میں 2728 اور تمل ناڈو میں 2283 فلائنگ اسکواڈز تعینات کیے گئے ہیں تاکہ کسی بھی شکایت پر 100 منٹ کے اندر کارروائی شروع کی جا سکے۔ اسی طرح ان دونوں ریاستوں میں 5363 ویجیلنس سینٹرز قائم کیے گئے ہیں جن میں سے 3142 مغربی بنگال میں اور 2221 تمل ناڈو میں ہیں۔ اس کے علاوہ اچانک تلاشی کے لیے ناکہ بندی کی کارروائیاں بھی کی جا رہی ہیں۔
