آئی آر جی سی کے بیان کے مطابق ’’آپریشن وعدہ صادق 4‘‘ مکمل طور پر کامیاب رہا۔ اس کارروائی میں خطے میں موجود امریکی اڈوں اور مقبوضہ علاقوں کے شمالی مقامات کو نشانہ بنایا گیا۔ رپورٹ کے مطابق اس آپریشن میں خرم شہر، فتح اور خیبر میزائلوں کے ساتھ ساتھ اسٹریٹجک ڈرونز کا استعمال کیا گیا۔
پاسدارانِ انقلاب کے مطابق یہ حملے نئے سپریم لیڈر مجتبیٰ خامنہ ای کے انتخاب کے ساتھ ہی کیے گئے ہیں۔
بحرین کے نیشنل کمیونیکیشن سینٹر نے اطلاع دی ہے کہ ایرانی حملے کے بعد گاؤں ’’معامیر‘‘ میں بحرین پیٹرولیم کمپنی (باپکو) کی ایک تنصیب میں آگ لگ گئی، تاہم حکام نے واضح کیا کہ آگ پر قابو پا لیا گیا ہے اور کوئی بڑا مادی نقصان نہیں ہوا۔
یہ کشیدگی 28 فروری کو ایران کے مختلف مقامات بشمول تہران پر امریکی اور اسرائیلی حملوں کے بعد بڑھی ہے۔ ان حملوں میں مبینہ طور پر ایک لڑکیوں کے اسکول کو بھی نشانہ بنایا گیا تھا جس میں شہری ہلاکتیں ہوئی تھیں۔ ایران نے اس کے جواب میں اسرائیل اور امریکی فوجی اڈوں پر جوابی حملے شروع کیے ہیں۔
