اس الیکشن کے لیے کاغذات نامزدگی کی جانچ پڑتال کے بعد ریٹرننگ آفیسر ڈاکٹر کے لکشمن نے ایک ریلیز میں اعلان کیا کہ صرف ایک امیدوار مسٹر نبین درست پایا گیا۔ توقع ہے کہ مسٹر نبین منگل کو باضابطہ طور پر صدارت کا عہدہ سنبھالیں گے۔
نتن نبین کے حق میں نامزدگی فارموں کے 37 سیٹ جمع کرائے گئے تھے، جو جانچ کے بعد درست قرار دیے گئے۔
ڈاکٹر لکشمن کے مطابق قومی صدر کے انتخابی عمل کا آغاز 36 ریاستی اکائیوں میں سے 30 میں پارٹی صدور کے انتخابی عمل مکمل ہونے کے بعد کیا گیا، جو کم از کم مطلوبہ 50 فیصد سے زیادہ ہے۔ انتخابی پروگرام 16 جنوری کو جاری کیا گیا تھا۔ نامزدگی کے لیے آج دوپہر دو بجے سے شام چار بجے تک کا وقت مقرر تھا اور شام چار سے پانچ بجے کے درمیان نام واپس لینے کا وقت تھا۔
نتن نبین کو 14 دسمبر کو قائم مقام صدر بنایا گیا تھا۔ انہوں نے قائم مقام صدر بنائے جانے کے بعد 16 دسمبر کو بہار کابینہ سے استعفیٰ دے دیا تھا۔ فی الحال وہ بہار اسمبلی میں بانکی پور نشست کی نمائندگی کرتے ہیں۔
