نئی دہلی، 26 اگست (مسرت ڈاٹ کام) ایشیا کپ 2025 سے قبل، سونی اسپورٹس نیٹ ورک کے ساتھ بات چیت میں وریندر سہواگ نے کہا کہ ہندوستان ایشیا کپ جیتے گا۔

ایشیا کپ 2025 کے آفیشل براڈکاسٹر، سونی اسپورٹس نیٹ ورک کے ساتھ ایک خصوصی گفتگو میں، وریندر سہواگ نے ہندوستان کے امکانات پر کہا، ’’ہم عالمی چیمپئن ہیں۔ ہم نے ابھی حال ہی میں چیمپئنز ٹرافی اور ٹی20 ورلڈ کپ جیتا ہے اور مجھے یقین ہے کہ ہم ایشیا کپ میں سب سے بہترین ٹیم ہیں اور امید ہے کہ ہم ایشیا کپ جیتیں گے۔‘‘

ہندوستان کی مہم کے لیے نوجوانوں کے مقابلے میں تجربے کی کتنی اہمیت ہے؟ اس پر انہوں نے کہا، ’’میرا خیال ہے کہ ہماری ٹیم بہت اچھی ہے اور اسکائی (سوریہ کمار یادو) آگے بڑھ کر قیادت کر رہے ہیں اور وہ ٹی20 فارمیٹ میں ایک بہترین کھلاڑی ہیں۔ مجھے یقین ہے کہ ان کی کپتانی میں ہم اچھا کھیل پیش کریں گے کیونکہ ہم نے پہلے بھی دیکھا ہے کہ جب سوریہ نے کمان سنبھالی تھی، ہم نے کئی ٹی20 میچ جیتے تھے اور مجھے یقین ہے کہ ہم ایشیا کپ بھی جیتیں گے۔‘‘

ہم عام طور پر ایشیا کپ کو ورلڈ کپ کی تیاری کے طور پر دیکھتے ہیں۔ 2026 کا ورلڈ کپ قریب آ رہا ہے۔ کیا یہ ایشیا کپ ورلڈ کپ کی تیاری کا کام کرے گا؟ اس بارے میں سہواگ نے کہا، ’’میرا خیال ہے کہ ٹی20 فارمیٹ میں، یہ ایشیا کپ ہمارے 2026 کے ٹی20 ورلڈ کپ کے لیے ایک بہترین تیاری ثابت ہو سکتا ہے۔ یہ موقع ہے یہ دیکھنے کا کہ کن نئے کھلاڑیوں کو موقع دیا جانا چاہیے اور کسے ٹیم میں شامل کیا جا سکتا ہے۔ آپ ورلڈ کپ کے لیے ٹیم بنانا شروع کر سکتے ہیں۔ میرے خیال میں ٹیم انڈیا کے لیے اپنی طاقت آزمانے کا ایشیا کپ سے بہتر کوئی موقع نہیں ہو سکتا۔‘‘

ٹیم کے انتخاب پر اکثر بحث ہوتی ہے۔ ایشیا کپ کے لیے موجودہ ہندوستانی ٹیم اور سلیکٹرز کے نظریے کے بارے میں پوچھے جانے پر سابق اوپنر نے کہا، ’’میرا خیال ہے کہ ہمارے پاس ایک بہت اچھے ٹی20 سلیکٹرز ہیں۔ میرے خیال میں ہمارے پاس ایک بہت اچھی ٹی20 ٹیم ہے۔ سوریہ کمار یادو کی قیادت میں، ہم نے ٹی20 میچوں میں اچھا کھیل پیش کیا ہے اور مجھے یقین ہے کہ انہیں سلیکٹرز کی جانب سے بہترین ٹیم ملے گی، اور امید ہے کہ ہم اس بار ایشیا کپ جیتیں گے۔‘‘

ایشیا کپ 9 ستمبر 2025 سے خصوصی طور پر سونی اسپورٹس نیٹ ورک اور سونی لِو پر شروع ہوگا۔