ہندوستان کو یہ دن بھی دیکھنا تھا ایک ایف آئی آر درج کرانے کے لئے ہندوستان کے لئے میڈل جیتنے والی خاتون پہلوانوں کو سپریم کورٹ کا دروازہ کھٹکھٹانا پڑے گا ایک شہہ زور کی حمایت میں ہندوسماج کے سادھو سنت سڑکوں پر نکلیں گے، انہیں پھول مالاؤں سے لادھ دیں گے، ان کی حمایت میں جے سری رام کے نعرے لگائیں گے۔ یہ سب دیکھ کر جموں و کشمیر کی کٹھوعہ کی آٹھ سالہ آصفہ کے ساتھ ہونے والی اجتماعی آبروریزی کا منظر نظروں کے سامنے گھوم گیا جب دیش بھگت، د نیا کی سب سے بڑی ایماندار پارٹی بھارتیہ جنتا پارٹی کے سینئر رہنماؤں نے زانیوں کی حمایت میں جلوس اور ترنگا یاترا نکالی تھی۔ خواتین نے زانیوں کے حق میں مظاہرہ کیا تھا۔ آج بی جے پی کی خواتین اراکین اسمبلی سے لیکر اراکین پارلیمنٹ تک نے ان خواتین پہلوانوں کے حق میں کوئی آواز بلند نہیں کی۔ نربھیا آبروریزی کے معاملے ابلنے والا پورا ملک اس وقت کنبھ کرن کی نیند سو رہاہے۔ خواتین رات میں کھلے آسمان کے نیچے جنتر منتر پر سونے پر مجبور ہوئیں۔ ہر بات پر ٹوئٹ کرنے والے سب سے بڑے ایماندار ہمارے پردھان سیوک نے جرائم کے معاملے میں چپی ہی سادھ رکھی ہے۔ میڈیا جو عتیق، اشرف، مختار انصاری، افضل انصاری کے معاملے میں گاؤں گاؤں محلہ لوگوں سے مافیا کے ختم ہونے کے بارے میں سوال پوچھ رہا تھا، سانپ سونگھ گیا ہے۔ عتیق، اسعد اور اشرف کے قتل کے معاملے میں اکثریتی طبقہ کے بیشتر لوگوں نے جشن منایااور اس قتل کو انصاف قرار دیا۔ برج بھوشن شرن کے معاملے میں خاموش ہے کیوں کہ برج بھوشن کا تعلق بی جے پی سے ہے اور بیشتر ہندو سماج بی جے پی کے گناہ کو ’پنیہ‘ سمجھتا ہے۔ برج بھوشن نے جب پہلی بار پارلمنٹ کا الیکشن لڑا تھا اس وقت ان پر 34مقدمے درج تھے۔جو ان کی بی جے پی میں ٹکٹ پانے کی اہم ترین صلاحیت تھے۔ طالب علمی کے زمانے میں ان پر بم پھیکنے کے الزام تھے، ہندو سماج کے لیڈر بننے کی اعلی ترین صلاحیتوں میں شامل ہے۔ انہوں نے خود ایک جگہ اعتراف کیا ہے کہ ان سے ایک قتل ہوا ہے۔ اس کے علاوہ اتنے دفعات کے تحت مقدمات درج ہیں اگر ان انصاف کے ساتھ عدالت سماعت کرے تو کئی سو سال تک سزا ہوسکتی ہے لیکن یہ عتیق، اشرف، اسعد، مختار انصاری افضل انصاری نہیں ہے جو جمہوریت کے چاروں ستون ان کو ماورائے عدالت مجرم ثابت کرنے میں لگ جائے۔ یہ تو بھگوان کے اوتار ہیں، جن کا پھول مالاؤں سے ’سواگت‘ ہورہا ہے، ان کے حق میں نعرے بلند کئے جارہے ہیں۔ سپریم کورٹ کے حکم پر ان کے خلاف ایف آئی آر درج ہوگئی ہے لیکن لاکھ ٹکے کا سوال یہ ہے کہ اگر متاثرین مسلمان ہوتے تو کیا سپریم کورٹ اسی طرح سے سرعت کے سماعت کرتا؟ گزشتہ نو سال سے خاص طور پر مسلمانوں پر ظلم و ستم کے پہاڑ توڑے جارہے ہیں،ان کے نوجوانوں کو سالہا سال سلاخوں کے پیچھے رکھا جارہاہے لیکن نچلی عدلیہ سے عدالت عظمی تک کا تبصرہ کے علاوہ کوئی فیصلہ نہیں آیا ہے۔ اسی وجہ سے فرقہ پرست اور ظالم حکومت کی ہمت بہت بڑگئی ہے اور مسلمانوں کو روڈ پر قتل کرنے لگے ہیں۔ 

اتنے سارے مقدمات کے باوجود آج تک ان کے گھر پر بلڈوزر نہیں چلے، ان کی جائداد میں پے پناہ اضافہ ہوتا گیا، اس کا پتہ لگانے کی نہ یوپی حکومت میں ہمت ہے، نہ انکم ٹیکس میں، نہ ای ڈی میں، سی بی آئی اور نہ این آئی اے میں، کیوں کہ اس کا تعلق بھارتیہ جنتا پارٹی سے ہے۔بی بی سی، ہندوستان ٹائمز اور دینک بھاسکر کے مطابق کارسیوک پورم سے تقریباً 15 کلومیٹر دور، جو کئی دہائیوں سے رام مندر تحریک کا مرکزی مرکز رہا ہے، چمکتی سفید حویلی برج بھوشن شرن سنگھ کی ہے۔ دو منزلہ بڑی حویلی میں صاف ستھرے لان ہیں اور چمکدار گاڑیاں کھڑی ہیں۔چھ بار کے ایم پی برج بھوشن شرن سنگھ سریو ندی کے پار نواب گنج قصبے میں واقع اس گھر سے تقریباً تین دہائیوں سے اپنی سیاست چلا رہے ہیں۔سیاست کے ماہر ارشاد علمی کے حوالے سے اخبار نے لکھا ہے کہ ان کے اپنے علاقے میں بہت زیادہ حامی ہیں۔ رام مندر کے ساتھ ان کی وابستگی نے بھی لوگوں میں برج بھوشن سنگھ کی مقبولیت بڑھانے کا کام کیا ہے، لیکن فی الحال ان کے سیاسی مستقبل کا اندازہ لگانا مشکل ہے۔اخبار کے مطابق 8 جنوری 1957 کو نواب گنج میں پیدا ہونے والے برج بھوشن نے نوعمری میں ہی اکھاڑے میں شمولیت اختیار کی تھی اور مقامی سطح پر ایک اچھے پہلوان کے طور پر جانے جاتے تھے۔سیاست میں ان کا کیریئر ساکیت کالج، ایودھیا میں طالب علمی کے دوران شروع ہوا۔اس دہائی میں ایودھیا شہر اتھل پتھل کے دور سے گزر رہا تھا، پھر رام مندر تحریک نے دھیرے دھیرے طاقت کا بھنور پیدا کیا اور اس بھنور میں برج بھوشن جیسے نوجوانوں نے خود کو سیاستدان کے طور پر پیش کیا، جس میں وہ کامیاب بھی ہوئے۔1991 میں رام مندر تحریک اپنے عروج پر تھی۔ برج بھوشن سنگھ نے اپنا پہلا لوک سبھا الیکشن بی جے پی کے ٹکٹ پر لڑا اور کانگریس کے آنند سنگھ کو تقریباً ایک لاکھ ووٹوں سے شکست دی۔اخبار لکھتا ہے کہ برج بھوشن سنگھ نے کھلے عام دعویٰ کیا کہ اس نے بابری مسجد کو گرانے میں مدد کی۔انہوں نے دعویٰ کیا کہ وہ اس علاقے سے پہلا شخص تھا جسے ملائم سنگھ حکومت نے ایجی ٹیشن کے دوران اور بابری انہدام کے بعد سی بی آئی کے ذریعہ گرفتار کیا تھا۔برج بھوشن سنگھ پر بھی سی بی آئی نے بی جے پی کے سینئر لیڈروں ایل کے اڈوانی، مرلی منوہر جوشی اور اتر پردیش کے سابق وزیر اعلیٰ کلیان سنگھ کے ساتھ الزام لگایا تھا لیکن 2020 میں انہیں تمام الزامات سے بری کردیا گیا۔ کیوں کہ جج نے ویڈیو اور اخبارات کے تراشے کو ثبوت ماننے سے انکار کردیا تھا. اگلے دن جج سبکدوش ہوگئے اور انہیں سرکاری عہدہ دے دیا گیا۔1990 کی دہائی میں، وہ اکثر سنتوں اور رام مندر تحریک کے رہنماؤں کے ساتھ دیکھے جاتے تھے، جس کی وجہ سے انہوں نے خود کو ایک شوخ ہندو رہنما کے طور پر پیش کیا۔
اخبار کے مطابق، 1992 میں اس پر گینگسٹر داؤد ابراہیم کے ساتھیوں کی مبینہ مدد کرنے کے الزام میں دہشت گردی اور خلل انگیز سرگرمیاں (روک تھام) ایکٹ (TADA) کا الزام عائد کیا گیا تھا۔اس معاملے میں انہیں کئی ماہ تک دہلی کی تہاڑ جیل میں رہنا پڑا۔ یہ 1999 کا زمانہ تھا۔ یہ سب کچھ ہو رہا تھا لیکن اس کے اثر و رسوخ میں کوئی کمی نہیں آئی تھی۔اگلے 15 سالوں کے دوران برج بھوشن سنگھ نے خود کو سیاست کے میدان میں اس طرح قائم کیا کہ انہیں شکست نہ دی جا سکی۔ بعض اوقات وہ ریاستی حکومت کے فیصلوں کو براہ راست چیلنج کرتے تھے۔اخبار لکھتا ہے کہ گونڈہ کے مقامی لوگوں کو آج بھی یاد ہے کہ اس وقت کی وزیر اعلیٰ مایاوتی نے گونڈا کا نام بدل کر لوک نائک جے پرکاش نارائن نگر کرنے کی کوشش کی تھی۔برج بھوشن سنگھ نے اس کوشش کی سخت مخالفت کی اور انہوں نے مایاوتی کو للکارتے ہوئے پدایاترا بھی نکالی۔ یہاں تک کہ اٹل بہاری واجپائی کو بھی اس معاملے میں مداخلت کرنا پڑی اور مایاوتی سے اپنا فیصلہ واپس لینے کو کہا۔
 برج بھوشن کالج کے زمانے سے ہی طلبہ کی سیاست میں سرگرم تھے۔ستر کی دہائی میں ایس کے ایودھیا کے ساکیت کالج میں جنرل سکریٹری بنے۔ مقامی صحافی بتاتے ہیں کہ طلبہ سیاست کے دوران ہی اس نے کالج کے کسی معاملے میں دستی بم پھینکا تھا جس کے بعد وہ مشہور ہوئے اور پھر وہ سیاست میں سرگرم ہوگئے۔یہ 1987 کی بات ہے۔ برج بھوشن نے بھی ضلع کی گنے کی ڈائرکٹری کے انتخاب کے لیے اپنا پرچہ نامزدگی داخل کیا۔ ایس پی نے برج بھوشن کو فون کیا اور گالی گلوچ کرتے ہوئے نامزدگی واپس لینے کی دھمکی دی۔برج بھوشن ایک انٹرویو میں کہتے ہیں، 'میں نے ایس پی کی طرف پستول تان کر 200 بار گالی دی۔ مقامی صحافی ہنومان سنگھ سدھاکر وہاں موجود تھے۔برج بھوشن ایک انٹرویو میں کہتے ہیں، 'جب کار سیوکوں نے بابری مسجد پر حملہ کیا تو کسی کے پاس ہتھیار نہیں تھے۔ قریب ہی کرشنا گوئل کا کام چل رہا تھا۔ ہم نے اسٹور روم کا دروازہ توڑا اور گیتی فروا کو کار سیوکوں کے پاس لے گئے۔ برج بھوشن طلبہ کی سیاست اور جنم بھومی تحریک کی وجہ سے خطے میں کافی مقبول ہو گئے تھے۔ 1991 میں جب بی جے پی نے برج بھوشن سنگھ کو لوک سبھا کا ٹکٹ دیا تو ان کے خلاف 34 مجرمانہ مقدمات درج تھے۔ بی جے پی نے سنگھ کو گونڈا کا رابن ہڈ کہہ کر دفاع کیا۔ انہوں نے بڑے مارجن سے الیکشن جیتا تھا۔
1996 میں، جب برج بھوشن سنگھ ٹاڈا  کے تحت تہاڑ جیل میں اپنی سزا کاٹ رہے تھے، ان کی بیوی کیتکی سنگھ نے گونڈا لوک سبھا سیٹ سے الیکشن لڑا تھا۔ برج بھوشن کے جیل میں ہونے کے باوجود کیتکی سنگھ نے کانگریس کے آنند سنگھ کو 80,000 ووٹوں سے شکست دی تھی۔برج بھوشن شرن سنگھ کے حوالے سے سب سے بڑا تنازع اس وقت کھڑا ہوا جب ان پر انڈرورلڈ سے تعلق کا الزام لگا۔ دہشت گردانہ سرگرمیوں میں ملوث ہونے پر ان کے خلاف ٹاڈا کا مقدمہ درج کیا گیا تھا۔ داؤد سے فون پر بات کرنے اور اس کی مدد کرنے کے الزامات بھی لگے۔ بعد میں سی بی آئی نے سنگھ کو ان تمام الزامات سے بری کر دیا۔

30 مئی 1996 کو برج بھوشن سنگھ، جو تہاڑ جیل میں اپنی سزا کاٹ رہے تھے، کو وزیر اعظم اٹل بہاری واجپائی کا ایک خط ملا۔ اس میں اس نے لکھا کہ تم بہادر ہو۔ ساورکر جی کو یاد رکھیں۔ اسے عمر قید کی سزا سنائی گئی تھی۔
برج بھوشن کا ٹکٹ گونڈا سے کاٹ کر گھنشیام شکلا کو دیا گیا۔ گھنشیام شکلا کی موت اسی دن ہو گئی جب ووٹنگ ہو رہی تھی۔ اس کے کچھ دنوں بعد برج بھوشن پر اس حادثہ کا الزام لگایا گیا۔واقعہ کی سی بی آئی انکوائری کا حکم دیا گیا ہے۔ یہاں بھی اس کا کوئی بال باکا نہیں ہوا۔بعد میں برج بھوشن بی جے پی چھوڑ کر ایس پی میں شامل ہو گئے۔ 2009 کے لوک سبھا انتخابات میں انہوں نے اتر پردیش کی قیصر گنج سیٹ سے ایس پی کے ٹکٹ پر الیکشن جیتا تھا۔ 2014 کے انتخابات سے پہلے بی جے پی میں گھر واپسی اور تب سے وہ بی جے پی کے رکن پارلیمنٹ ہیں۔یوپی میں 2022 کے اسمبلی انتخابات سے پہلے بی جے پی کے رکن پارلیمنٹ برج بھوشن شرن کا ایک انٹرویو وائرل ہوا تھا۔ اس میں اس نے خود ایک قتل کا اعتراف کیا۔ کہا- میں نے اپنی زندگی میں ایک قتل کیا ہے۔ لوگ جو بھی کہیں۔ وہ شخص جس نے رویندر کو مارا۔ میں نے اس کی پشت پر رائفل سے گولی مار دی۔دراصل یہ معاملہ 1983 کا ہے۔ رویندر سنگھ، اودھیش سنگھ اور برج بھوشن تینوں دوست تھے۔ کان کنی کے ٹھیکے لیتے تھے۔ تینوں دوست ایک جگہ گئے تو جھگڑا ہوگیا۔ وہاں کسی نے اپنے دوست کو گولی مار دی۔ اس کے بعد برج بھوشن نے حملہ آور کو گولی مار دی۔ کہا جاتا ہے کہ عدالت نے انہیں اس معاملے میں بری کر دیا۔
برج بھوشن شرن سنگھ اپنے لگژری طرز زندگی کے لیے بھی مشہور ہیں۔مقامی صحافی بتاتے ہیں کہ اس سرکاری اعداد و شمار کے علاوہ برج بھوشن سنگھ علاقے میں 50 سے زیادہ اسکولوں اور کالجوں کے مالک ہیں۔ وہ مختلف شعبوں میں ٹھیکے پر کام بھی کرتے ہیں۔ وہ ہیلی کاپٹر اور گھڑ سواری کے لیے بھی مشہور ہیں۔انتخابی حلف نامے کے مطابق برج بھوشن سنگھ کے پاس تقریباً 10 کروڑ روپے کی منقولہ اور غیر منقولہ جائیدادیں ہیں۔ ساتھ ہی ان کی اہلیہ کے پاس تقریباً 6 کروڑ روپے کی جائیداد ہے۔ اس کے پاس اسکارپیو، فورڈ اور فارچیونر جیسی کئی گاڑیاں ہیں۔
66 سالہ بی جے پی لیڈر قیصر گنج سیٹ سے لوک سبھا کے رکن ہیں لیکن خیال کیا جاتا ہے کہ ان کا اثر کم از کم پانچ لوک سبھا سیٹوں پر ہے جن میں قریبی گونڈا، قیصر گنج، بلرام پور شامل ہیں۔ اس کے علاوہ برج بھوشن کی بیوی کیتکی دیوی سنگھ گونڈا ضلع پنچایت صدر ہیں۔ کیتکی گونڈا سیٹ سے لوک سبھا کی رکن بھی رہ چکی ہیں۔ برج بھوشن کے بیٹے پرتیک بھوشن سنگھ گونڈہ صدر اسمبلی سیٹ سے ایم ایل اے ہیں۔گونڈا، بہرائچ، ڈومریا گنج، قیصر گنج اور شراوستی اضلاع میں ٹکٹوں کی تقسیم میں بی جے پی لیڈر کا غلبہ ہے۔ مقامی رہنما یہاں تک دعویٰ کرتے ہیں کہ انہیں جیتنے کے لیے کسی کی مدد کی ضرورت نہیں ہے، بلکہ ہر پارٹی انہیں اپنے طور پر ٹکٹ دینا چاہتی ہے۔برج بھوشن سنگھ کے سیاسی غلبے کی وجہ بھی ان کے ساتھ رہنے والی ذات پات ہے قیصر گنج لوک سبھا سیٹ کی بات کریں تو سماج کے تقریباً 20 فیصد ووٹر ہیں، جن میں سے زیادہ تر ووٹ برج بھوشن کو ڈالے گئے ہیں۔ اس کے علاوہ گونڈہ، بہرائچ، ڈومریا گنج، قیصر گنج اور شراوستی اضلاع میں بھی اس سماج کا مضبوط ووٹ بینک ہے۔ ماہرین کا کہنا ہے کہ برج بھوشن سنگھ پر بی جے پی کی کوئی بھی کارروائی اس کے لیے ایک بڑا ووٹ بینک کھونے کا خطرہ ثابت ہو سکتی ہے۔
غنڈہ گردی ایسی کہ اس نے ایس پی آفس میں ایس پی کی طرف پستول تان دی۔ سیاست ایسی ہے کہ وہ مسلسل 6 بار ایم پی کا انتخاب جیت رہے ہیں۔ کاروبار ایسا ہے کہ وہ 50 سے زائد اسکولوں اور کالجوں کے مالک ہیں۔ ان کا اثر و رسوخ ایسا ہے کہ وہ پارٹی لائن سے ہٹ کر بیانات دیتے ہیں۔ بے خوفی سے اتنا کہ انٹرویو میں قتل کا اعتراف کر لیتے ہیں۔ غلبہ ایسا ہے کہ وہ 11 سال تک ریسلنگ فیڈریشن آف انڈیا (WFI) کے صدر ہیں۔رانچی میں انڈر 15 نیشنل ریسلنگ چیمپئن شپ میں ریسلنگ فیڈریشن کے صدر برج بھوشن نے اسٹیج پر ہی ایک پہلوان کو تھپڑ مار دیا۔ دراصل اس پہلوان کی عمر زیادہ تھی۔ وہ برج بھوشن کے کالج کے نام پر ہونے والے مقابلے میں شامل ہونا چاہتے تھے۔ برج بھوشن وہیں بیٹھا تھا اور اس نے پہلوان پر ہاتھ چھوڑ دیا۔مسلمانوں کے ساتھ جرائم کے معاملے میں جشن منانے والااور خاموش رہنے والا ہندو سماج کے گھر میں آج آگ لگ گئی ہے۔ اس کی تپش سماج کے ہر طبقے تک پہنچ گئی ہے. بی جے پی کے ہاتھوں آج کوئی محفوظ نہیں ہے۔ جس طرح کھلم کھلا مجرموں کا ساتھ دیتی ہے، ان کی حمایت کرتی ہے اس کی وجہ سے عدالت بھی سہمی ہوئی ہے۔ ہندو سماج کا ایک بڑا طبقہ مودی کو بھگوا ن مانتا ہے اور برج بھوشن جیسے لوگ ان کے اوتار ہیں۔اس لئے ایف آئی آر درج ہونے کے باوجود اب تک نہ تو ان سے پوچھ گچھ کی گئی ہے اور نہ ہی گرفتار۔کیوں کہ وہ مسلمان نہیں ہے اور اندازہ لگایا جاسکتا ہے کہ سسٹم کس طرح سڑگل چکا ہے۔پوری طرح سسٹم ہندوتو کے رنگ میں رنگ چکا ہے۔