وزارتِ دفاع کے مطابق جمعرات کی شام سے جمعہ کی صبح تک فضائی دفاعی نظام نے یوکرینی ڈرونز کو روک کر تباہ کیا۔
اسپٹنک کے مطابق روسی وزارت دفاع نے کہا کہ یہ ڈرونز بیلگورود، برائنسک، وولگوگراد، ورونیش، کالوگا، کورسک، اوریول، پسکوف، روستوف، ریازان، سمولینسک، تامبوف، تویر اور تولا سمیت مختلف صوبوں کے علاوہ ماسکو، کریمیا، کالمیکیا اور کراسنوڈار کے علاقوں اور بحیرہ ازوف و بحیرہ کیسپین کے اوپر تباہ کیے گئے۔
دوسری جانب یوکرینی سول ڈیفنس اتھارٹی نے کہا ہے کہ کئیف پر روسی حملوں کی تازہ ترین لہر میں ہلاک ہونے والوں کی تعداد 21 ہو گئی ہے۔
یوکرینی میڈیا کے مطابق ریسکیو ٹیمیں ایک تباہ شدہ رہائشی عمارت کے ملبے تلے دبے 17 لاپتہ افراد کی تلاش میں مصروف ہیں جبکہ درجنوں زخمی مختلف اسپتالوں میں زیرِ علاج ہیں۔
رپورٹس کے مطابق روس نے رات کے وقت کئیف اور یوکرین کے دیگر علاقوں پر سیکڑوں ڈرونز، میزائلوں اور کروز میزائلوں سے حملے کیے، جو جنگ کے آغاز کے چار سال بعد بھی غیر معمولی شدت کے حملوں میں شمار کیے جا رہے ہیں۔
یوکرینی حکام کے مطابق کئیف کے گرد و نواح، خارکیف اور اودیسا سمیت متعدد علاقوں میں رہائشی عمارتوں کو شدید نقصان پہنچا ہے۔
واضح رہے کہ روس نے بدھ کے روز بھی فروری 2022 میں جنگ شروع ہونے کے بعد یوکرین پر اب تک کے شدید ترین حملوں میں سے ایک کیا تھا، جس میں 800 سے زائد ڈرون استعمال کیے گئے تھے۔
